වර්තමාන ජනාධිපතිවරයා ප්‍රමුඛ අලි පොහොට්ටු ආණ්ඩුව විසින් මැතිවරණ කොමිෂන් සභාව ඇතුළු රාජ්‍ය අංශයේ අනෙකුත් දෙපාර්තුමේන්තු ප්‍රධානීන්ට සිදුකරන ලද බලපෑම් හේතුවෙන් මේ වන විට 2023 පලාත්පාලන මැතිවරණයට අදාළ තැපැල් ඡන්ද විමසීම දින නියමයක් නොමැතිව කල් දමා තිබෙන බව පවසමින් එක්සත් ජාතික නිදහස් පෙරමුණ මාධ්‍ය වෙත නිකුත් කර තිබේ.
මේ මොහොත වන විට වර්තමාන ජනාධිපතිවරයා සහ ආණ්ඩුව විසින් රට වැසියා සතු සියළු අයිතීන් උදුරාගනිමින් සිටින බවත්වර්තමාන පාලකයන් විසින් ජනතා අයිතිවාසිකම තුට්ටුවකට මායිම් නොකොට මැතිවරණ සිතියම හකුලා දමමින් අර්ධ මිලිටරි පාලනයක් කරා යාමේ ගති ලක්ෂණ පෙන්වමින් සිටින බව එක්සත් ජාතික නිදහස් පෙරමුණ පවසයි.
ජනතා උද්ඝෝෂණ,නිදහස් මාධ්‍ය,කම්කරු වැඩ වර්ජන ජනතාවගේ භාෂණයේ හා ප්‍රකාශනයේ අයිතිය මෙකි සියල්ල වර්තමාන ජනාධිපතිවරයා ප්‍රමුඛ ආණ්ඩුව අත්තනෝමතිකව පැහැර ගනිමින් සිටින බව ඉතාම පැහැදිලි බව ද ඔවුන් සදහන් කරයි.
මේ සුදානම් වන්නේ පළාත් පාලන මැතිවරණ සිතියමද හකුලා දැමීමට බවත් ඊළගට පාර්ලිමේන්තුවද කල් දමාගැනීමට වර්තමාන ජනාධිපති ප්‍රමුඛ ආණ්ඩුව සුදානම් වනු නිසැක බවත් මාද්‍ය නිවේදනයේ සදහන් වේ.
එක්සත් ජාතික නිදහස් පෙරමුණ නිකුත් කල මාද්‍ය නිවේදනය….
-උපුටා ගැනීම.-
ප්‍රජාතන්ත්‍රවාදය වෙනුවෙන් අපි සටන් කල යුතුව ඇත.
ප්‍රජාතන්ත්‍රවාදය යනු ප්‍රජාව විසින් ප්‍රජාව පාලනය කිරිමයි. ප්රජාවගේ සාමුහික තීරණය මත ගොඩනගා ගනු ලබන පාලන තන්ත්‍රයක් මගින් සමස්ත ප්‍රජාව පාලනය කිරීම මෙහිදී අපිට දැකගත හැකිය.ප්‍රජාතන්ත්‍රවාදී රාජ්‍යන් තුල විවෘත වගකියන ආණ්ඩු, නිදහස් සාධාරණ මැතිවරණ,ප්‍රජා සහ දේශපාලණ අයිතින් පවතී. මේ මොහොත වන විට වර්තමාන ජනාධිපතිවරයා සහ ආණ්ඩුව විසින් එකී රටවැසියා සතු සියළු අයිතීන් උදුරාගනිමින් සිටි.
දියුණු ලෝකයේ ප්‍රජාතන්ත්‍රවාදී රාජ්‍යයක ජනතාව සතු පරමාදිපත්‍ය බලය ක්‍රියාවට නංවන මුලික අංගයක් ලෙස නිදහස් හා සාධාරණ මැතිවරණයකට ඇති අයිතිය පෙන්වා දිය හැකිය.වර්තමාන පාලකයන් විසින් එකී ජනතා අයිතිවාසිකම තුට්ටුවකට මායිම් නොකොට මැතිවරණ සිතියම හකුලා දමමින් අර්ධ මිලිටරි පාලනයක් කරා යාමේ ගති ලක්ෂණ පෙන්වමින් සිටි.ජනතා උද්ඝෝෂණ ,නිදහස් මාධ්‍ය,කම්කරු වැඩ වර්ජන ජනතාවගේ භාෂණයේ හා ප්‍රකාශනයේ අයිතිය මෙකි සියල්ල වර්තමාන ජනාධිපතිවරයා ප්‍රමුඛ ආණ්ඩුව අත්තනෝමතිකව පැහැර ගනිමින් සිටින බව ඉතාම පැහැදිලිය.
අපි සමාජයක් ලෙස තව දුරටත් නිහඩව මේ දෙස බලා සිටිය යුතුද ?
නැත කිසිසේත්ම අප එසේ බලා සිටිය යුතු නැත ඉතිහාසය පුරාවට මානව ප්රජාවගේ අයිතීන් බන්දේසියේ තබා පාලකයන් විසින් අපට ලබාදී නැත.සමාජ අරගල,විප්ලව සහ ප්‍රතිසංස්කරනවාදී සටන් ඔස්සේ පමණක් ජනතාව එකී අයිතීන් දිනාගෙන තිබේ.මේ නිශ්චිත මොහොතේ වර්තමාන දුෂිත ඒකාධිපති ආණ්ඩුව විසින් ලාංකීය ජනයා වෙත නිකුත් කරමින් සිටින්නේද එවැනි පණිවුඩයකි.එය සැබෑ දිග පළල සහිතව තේරුම් ගැනීමට ඔබ සහ මම බුද්ධිමත් විය යුතුය.පළාත් සභා මැතිවරණය හකුලා දමා දැන් වසර හතරකට වැඩිය.මේ සුදානම් වන්නේ පළාත් පාලන මැතිවරණ සිතියමද හකුලා දැමීමට බව ඉතාම පැහැදිලිය.ඊළගට පාර්ලිමේන්තුවද කල් දමාගැනීමට වර්තමාන ජනාධිපති ප්‍රමුඛ ආණ්ඩුව සුදානම් වනු නිසැකය. ජනාධිපතිවරනයක් සම්බන්දයෙන් කුමන කතාද ? හෙට අපි ප්‍රමාද වැඩිය. සිවිල් අයිතිවාසිකම් හා ප්‍රජාතනත්‍රවාදී නිදහස් මැතිවරණ දිනාගැනීමේ සටන අපි අද සිට ආරම්භ කල යුතුව ඇත.ඊට නීතිමය පසුබිම සකස් කිරීමටත් සමාජ නායකත්වය ලබාදීමටත් පක්ෂයක් ලෙස අපි සුදානම් බව ප්‍රකාශ කරන්නෙමු.
“රාජ්‍ය යනු භාරකාර මණ්ඩලයක් වන අතර එය වැසියාගේ යහපත උදෙසා කටයුතු කල යුත්තේය.නීතිය අභිබවා කටයුතු කරන පාලනයක් නෙරපා හැරීමේ බලය සමාජයට හිමිවන්නේය”.යනුවෙන් ජෝන් ලොග් නමැති දේශපාලන විචාරකයා සදහන් කොට ඇත්තේය.එය අපට මේ මොහොතේ පරමාදර්ශී සටන් පාඨයක් ලෙස හැදින්විය හැක්කේය. 75 වසරක් මේ රට කොල්ලකමින් ජනතාවගේ සිවිල් හා දේශපාලන අයිතිවාසිකම් මර්ධනය කරමින් ආර්ථික අයිතීන් හිතුවක්කාරී ලෙස උදුරා ගනිමින් තව දුරටත් ලාංකීය සමාජය විනාශය කරා ගෙනයන මේ ඒකාධිපති වියරුවට එරෙහිව අපි නැගී සිටිය යුතු බව දේශපාලන පක්ෂයක් ලෙස දැඩිව අවසාධාරණය කරන්නෙමු.ඒ සදහා නායකත්වය ලබාදීමටත් අවශ්‍ය සාධනීය මැදිහත්වීම සිදුකිරීමටත් අප සුදානම් බව අවධාරණය කරන්නෙමු
ජනාධිපති නීතිඥ මෛත්‍රී ගුණරත්න
මහ ලේකම් එක්සත් ජාතික නිදහස් පෙරමුණ
-උපුටා ගැනීම අවසන්-