වර්තමානයේ දැඩි කතාබහට ලක්ව පවතින ශ්‍රී දළදා මාලිගාව ඉදිරිපිට මාර්ගය විවෘත කිරීමට එරෙහි වීම හේතුවෙන් තමන් වහන්සේට මරණීය තර්ජනය කර නිර්නාමික ලිපි ලැබෙන බව අස්ගිරි මහනාහිමියෝ පවසති.
මේ මාර්ගය විවෘත කිරීමට තමන් වහන්සේ කිසිසේත් ඉඩ නොදෙන බවද උන්වහන්සේ කීහ.
මේ මාර්ගය විවෘත කිරීමෙන් දළදා වහන්සේට අගෞරවයක් සිදු වන බවත් මේ නිසා තමන් වහන්සේ මුල සිට ඊට විරුද්ධ වූ බවත් මහනාහිමියෝ පැවැසූහ.
ජනපති පවා මේ මාර්ගය විවෘත නොකර විකල්ප මාර්ගයක් ඉදිකිරීම සම්බන්ධව අවධානය යොමු කර තිබෙන බවත් එතුමන්ටත් නැති අවශ්‍යතාවක් වෙනත් පිරිසකට ඇතිව තිබෙන්නේ ඇයිද යන්න ප්‍රශ්නයක් බවත් උන්වහන්සේ ප්‍රකාශ කළහ.
වෙනත් ආගමික ස්ථානවලට සැතපුම් ගණන් පයින් යන්න තිබියදී දළදා මාලිගාව අභියසින් යෑමට පාරක් විවෘත කිරීම සුදුසුද යන්න කවුරුත් සිතා බැලිය යුතු බවද මහනාහිමියෝ පැවැසූහ.