එල්.ටී.ටී.ඊ සංවිධානයට ආධාර අනුබල ලබාදුන් බවට චෝදනා ලැබ මැලේසියාවේදී අත්අඩංගුවට ගෙන රක්ෂිත බන්ධනාගාරගත කර සිටි සැකකරුවකු නීතිපතිවරයාගේ උපදෙස් මත අදාළ චෝදනා වලින් නිදහස් කරන ලෙස කොළඹ අතිරේක මහෙස්ත්‍රාත් අරුණි ආටිගල මහත්මිය ඊයේ 24 නියෝග කළාය.
මෙලෙස මුදාහැරුණේ යාපනයේ පදිංචි සෙල්වදොරේ ගිරිබාදරන් නමැත්තාය. මොහු 2014 ජනවාරි 13 දා මැලේසියාවේදී එරට පොලීසිය විසින් අත්අඩංගුවට ගෙන මෙරට ත්‍රස්ත විමර්ශන කොට්ඨශය වෙත භාරදී තිබිණි.
සැකකරු වසර දෙකක් මෙම සිද්ධියට අදාළව රක්ෂිත බන්ධනාගාරගත කර සිටි බවත්, නීතිපති උපදෙස් අනුව මොහුට නිදහස ලබා දෙන ලෙසත් සැකකරු වෙනුවෙන් අධිකරණයේ පෙනී සිටි නීතීඥ ඒ.සී. ඉස්මයිල් අධිකරණයට කරුණු ඉදිරිපත් කළේය. ඒ අනුව මෙම සැකකරු නිදහස් කරන ලෙසට නීතිපතිවරයා විසින් ලබා දී ඇති උපදෙස් ප්‍රකාරව ත්‍රස්ත විමර්ශන කොට්ටාශයේ කරුණු දැක්වීම සැලකිල්ලට ගත් අධිකරණය මොහු නිදහස් කරන ලෙස නියෝග කළේය.