මාර්ග බලපත්‍ර සහිත බස්රථ සඳහා ලංගම ඩිපෝ සහ හඳුනාගත් ඉන්ධන පිරවුම්හල්වලින් ඉන්ධන ලබාදීමට අද (19)දින පැවති විශේෂ සාකච්ඡාවක දී තීරණය කර තිබේ.
ඉන්ධන බෙදාහැරීමේ ක්‍රියාවලිය ආරම්භ කිරීමේදී ම පොදු ප්‍රවාහනයට ප්‍රමුඛතාවය ලබාදෙමින් කටයුතු කිරීමට එහිදී සාකච්ඡා කර ඇත.
එමෙන්ම දැනට අනෙකුත් පිරවුම්හල්වල ඇති බස්රථ සඳහා ඩිපෝ වෙතින් ඉන්ධන ලබාදීමටත් තීරණය කර තිබේ.
ඉදිරියේදී ප්‍රවාහන නියාමන ආයතන මඟින් බලපත්‍රලාභී සහ පොදු ප්‍රවාහනයේ යෙදෙන බස්රථ සඳහා එම බස්රථ ධාවනය අනුව ඉන්ධන කෝටාවක් ලබාදීමට ද තීරණය කළ බව විදුලිබල හා බලශක්ති අමාත්‍යාංශය නිවේදනය කළේය.
අදාළ සාකච්ඡාව සඳහා ප්‍රවාහන හා ජනමාධ්‍ය අමාත්‍ය බන්දුල ගුණවර්ධන, විදුලිබල හා බලශක්ති අමාත්‍ය කංචන විජේසේකර මෙන්ම අමාත්‍යාංශ නිලධාරීන් හා අනුබද්ධ ආයතනවල ප්‍රධානීන් සහභාගි වී ඇත.