ජාතික ඖෂධ නියාමන අධිකාරියේ දත්ත ගබඩාවේ දත්ත යළි ලබා ගැනීමේ කටයුතු සඳහා විශේෂඥ සහය ලබා ගැනීමට තීරණය කර තිබේ.
එම විශේෂඥයා අදාළ කටයුතු සඳහා යොදා ගැනීම දත්ත පද්ධතිය භාරව ක්‍රියාකළ ආයතනය මගින් සිදුකරන බව ඖෂධ නිෂ්පාදන සැපයීම් හා නියාමන රාජ්‍ය අමාත්‍ය අමාත්‍යාංශ ලේකම් වෛද්‍ය සමන් රත්නායක මහතා පවසයි.
ඒ අනුව, ඒ සඳහා සුදුසු විශේෂඥයින් 4 දෙනෙකු සම්බන්ධයෙන් මේ වන විට යෝජනා වී තිබේ.
රාජ්‍ය අමාත්‍යාංශ ලේකම් වෛද්‍ය සමන් රත්නායක මහතා පැවසුවේ, ඉන් දෙදෙනෙකු ශ්‍රී ලාංකිකයින් වන අතර අනෙක් දෙදෙනා විදෙස් ජාතිකයින් ය.
ඉන් සුදුසු විශේෂඥයා තෝරා ගැනීම අමාත්‍යාංශය පත්කළ කමිටුව මගින් සිදු කරනු ඇති.
දත්ත යළි ලබා ගැනීමේ කටයුතුවලට අදාළ ගිවිසුම් අත්සන් කිරීම ද, මේ වන විට අවසන් කර ඇති බව ඔහු පවසයි.
එම කටයුතු සාර්ථකව අවසන් කිරීම සම්බන්ධයෙන් දත්ත පද්ධතිය භාරව සිටින සමාගම සැලැස්මක් ඉදිරිපත් කළ යුතු අතර, ඒ සඳහා කමිටු අනුමැතිය හිමිවීමෙන් පසු, දත්ත යළි ලබා ගැනීමේ කටයුතු ආරම්භ කෙරෙන බව ද, ඔහු පවසයි.
දත්ත යළි ලබා ගැනීම පිළිබඳ සියලු කටයුතු ඒ සම්බන්ධයෙන් පත් කළ කමිටුවේ පූර්ණ අධීක්ෂණය යටතේ ක්‍රියාත්මක වන බව ලේකම්වරයා සඳහන් කරයි..
එම කටයුතු ඉදිරි සතිය තුළ ආරම්භ වනු ඇතැයි ද, ඔහු වැඩිදුරටත් සඳහන් කළේ ය.