පාර්ලිමේන්තු මන්ත්‍රී රිෂාඩ් බදියුදීන්ගේ නිවසේ මෙහෙකාර සේවය සිදුකල වතුකරයේ තරුණියක් වූ ජූඩ් කුමාර් ඉෂාලිනී පිලිස්සී මියයාම සම්බන්ධයෙන් සිදුකරන පරීක්ෂණ අපක්ෂපාති ලෙස සහ කඩිනමින් සිදුකරන ලෙස මහජන ආරක්ෂක අමාත්‍ය සරත් වීරසේකර මහතා විමර්ශන අංශවලට උපදෙස් ලබා දී තිබෙනවා.
ඒ අනුව වැඩිදුර පරීක්ෂණ සඳහා මිය ගිය දැරියගේ සිරුර යලි ගොඩ ගැනීමට ද සිදුවිය හැකි බවයි වාර්තා වන්නේ.
මීට ඉහතදී රිෂාඩ් බදියුදීන් මන්ත්‍රීවරයාගේ බිරිඳගෙන්, නිවසේ සේවකයන් ඇතුළු නිවැසියන්ගෙන්, එම නිවසේ මීට ඉහතදී සේවය කල කාන්තාවන් දෙදෙනෙක්, මියගිය දැරියගේ පවුලේ උදවිය ද ඇතුළු පාර්ශව රැසකගෙන් ප්‍රකාශ සටහන් කර ගැනීමට පොලීසිය මේ වන විට කටයුතු කර ඇත.
කෙසේ වෙතත් රිෂාඩ් බදියුදීන්ගේ නිවසට මෙම දැරිය පැමිණීමට පෙර ලිංගික අපයෝජනයකට ලක්වීමේ කිසිදු හෝඩුවාවක් තවමත් ලැබී නොමැති අතර මෙහෙකාර සේවයට පැමිණීමෙන් පසුව ඇය අතවරයන්ට ලක් වන්නට ඇති බවට පරීක්ෂණ කණ්ඩායම් සැක පළකර සිටියි.