සමගි ජන බලවේගයට සහය දැක්වූ වලල්ලාවිට ප්‍රාදේශීය සභාවේ විපක්ෂ නායක ඇතුළු මන්ත්‍රීවරු පස් දෙනෙක් අද (22)දින නැවත එක්සත් ජාතික පක්ෂයට එක් වූහ.
මෙලෙස නැවත එක්සත් ජාතික පක්ෂයට එක්වූයේ වලල්ලාවිට ප්‍රාදේශීය සභාවේ විපක්ෂනායක දිලිප් පිටිගල මහතා ඇතුළු මන්ත්‍රීවරුන් පස් දෙනෙකි.
එක්සත් ජාතික පක්ෂයේ බුලත්සිංහල ආසන සංවිධායක සහ හිටපු රාජ්‍ය අමාත්‍ය පාලිත තෙවරප්පෙරුම මහතා සමග පිටකෝට්ටේ සිරිකොත එක්සත් ජාතික පක්ෂ මූලස්ථානයට පැමිණි ඔවුහු මාධ්‍ය හමුවක් ද පැවැත්වූහ.
මාධ්‍ය හමුවේ දී අදහස් දක්වමින් වලල්ලාවිට ප්‍රාදේශීය සභා විපක්ෂ නායක දිලිප් පිටිගල මහතා පැවසූයේ “පාං”කියා ගන්නටවත් බැරි තරම් අසරණව සිටින ග්‍රාමීය ජනතාවගේ ආර්ථික පීඩනය වෙනුවෙන් සැබෑ සටනක් කිරීමේ ප්‍රවේශය සඳහා නැවත එක්සත් ජාතික පක්ෂයට එකතු වූ බවයි.
මෙම අවස්ථාවට එජාප පළාත් පාලන කමිටු සභාපති හිටපු පාර්ලිමේන්තු මන්ත්‍රී සන්දිත් සමරසිංහ මහතා ද සහභාගි විය.