ඇෆ්ලටොක්සීන් ඇති ත්‍රිපෝෂ තොග විනාශ කර ඇති නිසා රජය විසින් සායනවලදි බෙදා දී ඇති ත්‍රිපෝෂ සැකයකින් තොරව අද සිට පරිභෝජනයට ගන්නා ලෙස ගර්භිණී මව්වරු ඇතුළු මව්වරුන්ට සෞඛ්‍ය අමාත්‍යාංශය දැනුම් දීමක් කරයි.
පවුල් සෞඛ්‍ය සේවා කාර්යාලයේ අධ්‍යක්ෂ විශේෂඥ වෛද්‍ය චිත්‍රමාලි ද සිල්වා පැවසුවේ ත්‍රිපෝෂ ආහාරයට ගැනීමට කිසිදු ගර්භිණී මවක් අනියත බියක් ඇති කර නොගත යුතු බවත් මේ සම්බන්ධව ව්‍යාජ තොරතුරු ප්‍රචාරයවන බවත්ය.
මේ වන විට ඇෆ්ලටොක්සීන් ඇති බවට පරීක්ෂණවලින් තහවුරු කරගත් ත්‍රිපෝෂ භාවිතයෙන් ඉවත්කර ඇති බවත් එම නිසා සායනවලදී ලබා දී ඇති ත්‍රිපෝෂ භාවිතයට ගැනීමට හැකියාව ඇති බවත් අධ්‍යක්ෂවරිය සඳහන් කළාය.
මීට මාස තුනකට පෙර ත්‍රිපෝෂ සමාගම නිකුත් කළ ත්‍රිපෝෂ තොගයෙහි ඇෆ්ලටොක්සීන් ප්‍රමාණය වැඩි වශයෙන් තිබූ බවට සිදු කළ පරීක්ෂණවලදී අනාවරණය විය.
එසේ ඇෆ්ලටොක්සීන් තිබූ බවට තහවුරු වූ ත්‍රිපෝෂ තොගය මේ වන විට විනාශ කර ඇති බව සෞඛ්‍ය අමාත්‍යාංශය සහ ත්‍රිපෝෂ සමාගම තහවුරු කරයි.