පක්ෂ නායක රැස්වීමක් අද (07) දිනයේ පැවැත්වීමට නියමිතව තිබේ.
කොවිඩ් තත්ත්වය හමුවේ සෞඛ්‍ය මාර්ගෝපදේශයන්ට අනුගත වෙමින් පාර්ලිමේන්තු රැස්වීම් පැවැත්වීම සහ පාර්ලිමේන්තු ඉදිරි වැඩකටයුතු සම්බන්ධයෙන් සාකච්ඡා කිරීම මෙහි අරමුණය.
ඒ අනුව අද පස්වරු 3ට පාර්ලිමේන්තුවේ දි පක්ෂ නායක රැස්වීම පැවැත්වෙනු ඇත.
කථානායක මහින්ද යාපා අබේවර්ධන මහතාගේ ප්‍රධානත්වයෙන් එම රැස්වීම පැවැත්වීමට නියමිත අතර මේ සඳහා සහභාගි වන ලෙස සියලු පක්ෂ ලේකම්වරුන්ට දැනුම් දී තිබේ.
මේ අතර පාර්ලිමේන්තුව හෙට (08) දිනයේ සිට දින 4ක් පැවැත්වීමට මීට පෙර තීරණය කර තිබුණි.
මේ අතර සමගි ජනබලවේගය පක්ෂයේ පාර්ලිමේන්තු මන්ත්‍රී හර්ෂණ රාජකරුණා මහතා හට කොවිඩ් -19 වෛරසය ආසාදිත බවට තහවුරු වී තිබේ.
මේ වන විට මන්ත්‍රීවරයා නිවෙස් ගතව ප්‍රතිකාර ලබන බව වාර්තා වේ.
ඒ අනුව මේ වන විට මන්ත්‍රීවරුන් 50කට ආසන්න ප්‍රමාණයකට කොවිඩ් -19 වෛරසය ආසාදනය වී තිබේ.