ආණ්ඩුක්‍රම ව්‍යවස්ථා සම්පාදක මණ්ඩලයේ මෙහෙයුම් කමිටු වාර්තාව ව්‍යවස්ථාව බවට පත්වුවහොත් එය රටට මර උගුලක් බව අමරපුර ධම්මරක්ඛිත මහා නිකායේ මහනායක පූජ්‍ය ත්‍රිකුණාමලයේ ආනන්ද හිමියෝ අවධාරණය කළහ.
වර්තමාන ආණ්ඩුවේ වැඩකටයුතු ගැන කිසිදු විශ්වාසයක් නොමැති බවත්, මෙහෙයුම් කමිටු වාර්තාව ව්‍යවස්ථාවක් බවට පත් කිරීමට ඔවුන්ට විවිධ උපක්‍රමවලින් හැකියාව තිබෙන බවත් උන්වහන්සේ පවසා සිටියහ.
මේ පිළිබඳ සැබෑ ලෙස අදහස් දක්වන්නන් රටට බිල්ලන් මවාපාන පිරිස් බවට ආණ්ඩුව හඳුන්වන බවද ආනන්ද හිමියෝ අවධාරණය කළහ.
එහෙත් ව්‍යවස්ථාව සකස් කළොත් එය බිල්ලෙකු නොව මර උගුලක් බවට පත්වන බව අද (24දා) මහා සංඝරත්නය විසින් කොළඹ සමස්ත ලංකා බෞද්ධ මහා සම්මේලනයේ පවත්වන ලද මාධ්‍ය සාකච්ඡාවකදී උන්වහන්සේ පවසා සිටියහ.
මේ අවස්ථාවේදී රටට ව්‍යවස්ථාවක් අවශ්‍ය නොවන බවත්, අවශ්‍ය වන්නේ ජනතා ගැටලු විසඳීම බවද මහා සංඝරත්න එහිදී පවසා සිටියහ.
මේ පිළිබඳ සඳහන් කර මහනායක ස්වාමීන් වහන්සේලා හා විද්වත් ස්වාමීන් වහන්සේලා සියය නමක් අත්සන් කළ සන්දේශයක් ජනාධිපතිවරයාට හා අගමැතිවරයාට බාරදෙන බවද මහා සංඝරත්නය අවධාරණය කළහ.