මහ බැංකු අධිපති අර්ජුන් මහේන්ද්‍රන්ට වඩා හිටපු මහ බැංකු අධිපති අජිත් නිවාඩ් කබ්රාල් මහතා වංචා දූෂණ සම්බන්ධයෙන් චෝදනා ලබා ඇති බවත් එසේ තිබියදී අර්ජුන් මහේන්ද්‍රන් පිළිබඳ පමණක් කථාකිරීම විහිලුවක් බව වාරිමාර්ග හා ජල සම්පත් කළමනාකරණ ඇමැති විජිත් විජයමුණි සොයිසා පවසයි.
ඔහු මේ බව ප්‍රකාශ කළේ ඊයේ (30) වාරි මාර්ග දෙපාර්ත‍මේන්තුවේ පැවති මාධ්‍ය හමුවකට සහභාගි වෙමිනි.
එහිදි අදහස් දැක්වූ ඔහු මෙසේද කීය. මුලින්ම මහ බැංකු අධිපති ගැන චෝදනාව ඉදිරිපත් කළේ එක්සත් ජනතා නිදහස් සන්ධානයේ මහ ලේකම් මහින්ද අමරවීර මහතා. එතුමා තමයි ගිහිල්ලා අල්ලස් කොමිසමට මේ පිළිබඳ පැමිණිලි කළේ. පසුව ශ්‍රී ලංකා නිදහස් පක්ෂයේ සහ එක්සත් ජාතික පක්ෂයේ ඇමැතිවරු මේ පිළිබඳ කෝප් කමිටුව තුළ සාකච්ඡා කළා. ඒ අනුව රජයට සෘජු තීරණයක් ගන්න පුළුවන් වුණා මහ බැංකු අධිපතිත්වය ගැන. කෝප් කමිටුව මේ ප්‍රශ්නය සම්බන්ධයෙන් සාකච්ඡා කළ දේවල් පිළිබඳ විගණකාධිපතිතුමාගේ වාර්තාවේ පැහැදිලිව සඳහන් වෙනවා.