ශ්‍රී ලංකා නිදහස්‌ පක්‍ෂයේ ආසන සංවිධායක ධුර දරමින් පක්‍ෂයේ ප්‍රතිසංවිධාන වැඩපිළිවෙළ සාර්ථක කර ගැනීමට සහාය ලබා නොදෙන ඒකාබද්ධ විපක්‍ෂය නියෝජනය කරන මන්ත්‍රීවරුන් සියලුම දෙනා ළඟදීම ආසන සංවිධායක ධුරවලින් ඉවත් කරන බව එක්‌සත් ජනතා නිදහස්‌ සන්ධානයේ මහලේකම් ධීවර හා ජලජ සම්පත් ඇමැති මහින්ද අමරවීර මහතා ඊයේ (13දා) පැවසීය.
ශ්‍රී ලංකා නිදහස්‌ පක්‍ෂ ප්‍රතිසංවිධාන වැඩ පිළිවෙළ රට පුරා සාර්ථකව ක්‍රියාත්මක වන නමුත් ඒකාබද්ධ විපක්‍ෂය නියේජනය කරන මන්ත්‍රීවරුන් පක්‍ෂ ප්‍රති සංවිධාන වැඩපිළිවෙළට සහය ලබා නොදීම නිසා මැතිවරණ කොට්‌ඨාස රැසක පක්‍ෂ ප්‍රතිසංවිධාන වැඩපිළිවෙළ ක්‍රියාත්මක කිරීමට නොහැකි වී තිබෙන බවත් හෙතෙම කීය.
එම නිසා අලුතින් ආසන සංවිධායකවරුන් එම මැතිවරණ කොට්‌ඨාස සඳහා පත් කිරීමට පක්‍ෂය තීරණය කර තිබෙන බවත් කී ඒ මහතා ඒ සඳහා සුදුසුකම් ඇති ආසන සංවිධායකයන්ගේ නාම ලේඛනයක්‌ පක්‍ෂය විසින් සකස්‌ කර තිබෙන බවද පැවසීය.