මේ මාසයේ සිට ලබන සැප්තැම්බර් දක්වා කාලය තුළ ඉන්දියානු සංචාරක මගී ප්‍රවාහන නෞකා 13 ක් ගෙන්වා ගැනීමට ගිවිසුම්ගත වූ බව, හම්බන්තොට ජාත්‍යන්තර වරාය පවසයි.
සකසුරුවම් කාණ්ඩයේ සංචාරක නෞකාවල සිට ඕනෑම සුඛෝපභෝගී නෞකාවක් දක්වා සියලු පහසුකම් සැපයීමට වරාය මෙහෙයුම් කටයුතු සූදානම් බව නිවේදනයක් නිකුත් කරමින් හම්බන්තොට ජාත්‍යන්තර වරායේ ප්‍රධාන විධායක නිලධාරි ජොන්සන් ලියූ මහතා සඳහන් කරයි.
ඒ අනුව, ඉන්දියානු සහ ජාත්‍යන්තර සංචාරකයින්ට,චෙන්නායි සිට හම්බන්තොට දක්වා සංචාරක නෞකා සේවාව ලබා ගත හැකි බව එම නිවේදනයේ සඳහන් ය.
ගිවිසුම්වලට අනූව මගීන් 745 දෙනෙකු රැගත් නෞකාවක් ඉන්දියාවේ සිට පළමුව මෙරටට පැමිණිමට නියමිතයි.
එය මෙරට තවත් ප්‍රධාන නෞකා ගමනාන්ත 3ක් අතර යාත්‍රා කිරීමට සැලසුම් කර තිබේ.
ඉන්දියන් සාගරයේ කෘස් නෞකා සඳහා ඉහළම පහසුකම්වලින් සමන්විත වරාය ලෙස හම්බන්තොට ජාත්‍යන්තර වරාය නම් කළ හැකි බව ද, ප්‍රධාන විධායක නිලධාරිවරයා වැඩි දුරටත් සඳහන් කරයි.