යෝජිත රාජ්‍ය හා පෞද්ගලික ඒකාබද්ධ ක්‍රමවේදය තවදුරටත් පුළුල් කිරීමට කටයුතු කරන බවත්,එය ඉදිරියේදී රටට අවශ්‍ය යටිතල පහසුකම් සංවර්ධනය සඳහා යොදාගන්නා බවත්, ඒ තුලින් විදේශ ආයෝජකයන් රටට ආකර්ශනය කර ගැනීමට බලාපොරොත්තු වන බවත් මුදල් අමාත්‍ය රවී කරුණානායක පවසයි.
ඔහු මේ බව ප්‍රකාශ කළේ ඇමෙරිකානු ආධාර ආයතනය (UDAID) විසින් සංවිධානය කරන ලද කොළඹ කිංග්ස්බරි හෝටලයේ පැවති සමුළුවක් අමතමින් ය.
මුදල් අමාත්‍යවරයා එහිදී පැවසුවේ,විශාල මුදල් සම්භාරයක් වියදම් කළ යුතු, මහා පරිමාණ යටිතල පහසුකම් ව්‍යාපෘති, විදේශ හා පෞද්ගලික අංශයේ ආයෝජකයන්ට භාරදීමෙන් රජයේ ප්‍රාග්ධන වියදම් අවම කරගැනීමට හැකි බවයි.
සැලසුම්ගත රාජ්‍ය හා පෞද්ගලික ඒකාබද්ධ ව්‍යාපෘති ක්‍රමවේදය තුලින් විශාල විදේශ ආයෝජන ප්‍රමාණයක් රට තුලට ඈදාගැනීමට හැකියාව උදා වන බවත්,එමඟින් රටට හා ජනතාවට පහසුකම් රැසක් ලබාගත හැකි බව පවසන අමාත්‍යවරයා කියා සිටියේ විදේශ ආයෝජකයන් යටිතල පහසුකම් සංවර්ධනය සඳහා මුදල් යොදවන විට ඒ වෙනුවෙන් රජය දැරිය යුතු විශාල මුදල් ප්‍රමාණයක් ඉතිරි වන බැවින් රජයට එම මුදල් ණය ලෙස ලබාගෙන ආපසු ගෙවීමට සිදුවන අපහසුතාවය මගහැරෙන බවයි.
ශ්‍රී ලංකාවේ අමෙරිකානු තානාපති අතුල් කෙෂාප්, අමෙරිකානු ආධාර ආයතනයේ වැඩබලන අධ්‍යක්ෂ තෝමස් බෙයාර්, දයා ගමගේ, ආචාර්ය හර්ෂ ද සිල්වා, රාවුෆ් හකීම්, ඩී.එම්. ස්වාමිනාදන් සහ ඉරාන් වික්‍රමරත්න යන අමාත්‍යවරු සහ නියෝජ්‍ය අමාත්‍යරු මෙම අවස්ථාව සදහා සහභාගී වී තිබේ.