පාර්ලිමේන්තු මන්ත්‍රී පාඨලී චම්පික රණවක මහතා නායකත්වය දරණ 43 වන සේනාංකය සහ කුමාර වෙල්ගම මහතාගේ නායකත්වයෙන් යුත් නව ලංකා නිදහස් පක්ෂය එළඹෙන පළාත් පාලන මැතිවරණයේ දී එක්ව තරඟ කිරීමට ගිවිසුම්ගත වී තිබේ.
ඒ සඳහා වන ගිවිසුමකට ද පාඨලී චම්පික රණවක මහතා සහ කුමාර වෙල්ගම මහතා අද (16)දින අත්සන් තැබීය.
තම කණ්ඩායම් දෙක එක්ව පළාත් පාලන ආයතන කිහිපයකට තරඟ කරන බවත්, තවත් ආයතනවලට ස්වාධීනව අපේක්‍ෂකයන් ඉදිරිපත් කිරීමට බලාපොරොත්තු වන බවත් පාඨලී චම්පික රණවක මහතා මෙහිදී පැවසීය.
‘හෙලිකොප්ටරය’ ලකුණින් තරඟ කරන නිදහස් ජනතා සන්ධානයට ද සුබ පතන බව කී රණවක මහතා ඔවුන් සමඟ ද සාකච්ඡා කළ නමුත් යම් යම් කරුණු සම්බන්ධයෙන් එකඟතාවට පත්වීමට නොහැකිවීම නිසා වෙනම තරඟ කිරීමට තීරණය කළ බව සඳහන් කළේය.
ඉදිරි පළාත් පාලන මැතිවරණයේ දී පොදු සතුරා විය යුත්තේ රට බංකොලොත් කළ ශ්‍රී ලංකා පොදුජන පෙරමුණ බවත්, සෙසු සියලු කණ්ඩායම්වලට සුබපතන බවත් හෙතෙම කීය.
පාර්ලිමේන්තු මන්ත්‍රී කුමාර වෙල්ගම මහතා ද මෙහිදී පැවසුවේ නිදහස් ජනතා සන්ධානයේ සිටින්නේ තම සහෝදර මන්ත්‍රීවරුන් බවයි.