යුද්ධයේ අවසන් සමයේ නාවික හමුදාවේ මාධ්‍ය ප්‍රකාශක ලෙස කටයුතු කළ කපිතාන් ඩී.කේ.පී දසනායක මහත විදෙස් ගතවීමට කරනු ලැබූ ඉල්ලීම කොළඹ කොටුව මහෙස්ත්‍රාත් ලංකා ජයරත්න මහත්මිය විසින් ඊයේ (06) ප්‍රතික්ෂේප කළාය.
ඒ, කොටහේන සහ ත්‍රිකුණාමලය ප්‍රදේශවල දෙමළ තරුණයන් 11 දෙනෙකු අතුරුදන්වීමේ සිද්ධියට අදාල නඩුව අද කැදවූ අවස්ථාවේදීය.
තමාට පුහුණුවක් සඳහා විදෙස් ගතවීමට අවසර ලබාදෙන ලෙස මීට පෙර හිටපු නාවික හමුදා මාධ්‍ය ප්‍රකාශකවරයා අධිකරණයෙන් ඉල්ලීමක් කර තිබුණි.
එහෙත් අද පෙරවරුවේ එම නඩුව කැදවූ අවස්ථාවේදී අපරාධ පරීක්ෂණ දෙපාර්තමේන්තුව අධිකරණයෙන් ඉල්ලා සිටියේ හිටපු නාවික හමුදා ප්‍රකාශකවරයා මෙම නඩුවේ සැකකරුවෙකු කිරීමට ප්‍රමාණවත් කරුණු පවතින බැවින් මොහුට විදෙස් ගතවීමට අවසර ලබා නොදෙන ලෙසයි.
ඒ අනුව කරුණු සලකා බැලු මහේස්ත්‍රාත්වරිය හිටපු නාවික හමුදා ප්‍රකාශකවරයා කරනු ලැබූ ඉල්ලීම ප්‍රතික්ෂේප කළාය.