යාපනය අධි ආරක්ෂිත කලාපයේ වලිකාමම් උතුර කොට්ඨාශයේ පිහිටි ඉඩම් අක්කර 400 ක් ප්‍රතිපාදන ලද විගස නිදහස් කිරීමට සුදානම් කොට ඇති බව යාපනය ආරක්ෂක සේනා නිළධාරීන් උතුරු පළාත් ආණ්ඩුකාර සුරේන් රාඝවන් මහතා වෙත පැවසීය.
යාපනය අධි ආරක්ෂිත කලාපයේ පිහිටි යාපනය මයිලිඩි රෝමානු කතෝලික විද්‍යාලය හා මයිලිඩි කනික්කායි මාදා දේවස්ථානය නිරීක්ෂණය,යාපනය ආරක්ෂක අංශ සතු සිවිල් ජනතාවගේ ඉඩම් නිරීක්ෂණයට උතුරු පළාත් ආණ්ඩුකාරවරයා එක්වු අවස්ථාවේදී යාපනය ආරක්ෂක අංශ විසින් ඊයේ(31) අදාළ දැනුවත් කිරීම සිදුකළ බව උතුරු පළාත් ආණ්ඩුකාර කාර්යාලය පවසයි.
උතුරු පළාත් ආණ්ඩුකාර කාර්යාල නිළධාරීන් පැවසූවේ ජිනිවා මානව හිමිකම් කවුන්සලයේ සැසි වාරය වෙත සහභාගිවීමෙන් අනතුරුව යාපනය අධි ආරක්ෂිත කලාපයේ පිහිටි සිවිල් ජනතාවගේ ඉඩම් නිදහස් කිරීම කඩිනම් කිරීමේ අරමුණෙන් යුතුව ආණ්ඩුකාරවයා අදාළ නිරීක්ෂණ චාරිකාවට එක්වු බවයි.
ජනතාව වෙත නිදහස් කිරීමෙන් අනතුරුව සංවර්ධනය වන යාපනය මයිලිඩි ධීවර වරායේ සංවර්ධන කටයුතු හා මයිලිඩි ආරෝග්‍ය මාතා දේවස්ථානයේ සංවර්ධන කටයුතු නිරීක්ෂණයටද රාඝවන් මහතා එහිදි එක්විණ.