අමාත්‍යධූර ලබා දෙන්නැයි ඉල්ලමින් ශ්‍රී ලංකා නිදහස් පක්‍ෂයේ මන්ත්‍රීවරුන් සිව් දෙනෙකුගෙන් සමන්විත ලැයිස්තුවක් ජනාධිපති මෛත්‍රීපාල සිරිසේන මහතා වෙත ඉදිරිපත් කර ඇති බව වාර්තාවනවා.
පාර්ලිමේන්තු මන්ත්‍රීවරුන් වන විජිත් විජයමුණි සොයිසා, පියසේන ගමගේ, ලක්‍ෂමන් සෙනෙවිරත්න සහ ඒ.එච්.එම්. ෆවුසි යන මහත්වරුන් අමාත්‍යවරුන් ලෙස නම් කරන ලෙසයි ජනාධිපතිවරයාට එමගින් යෝජනා කර ඇත්තේ.
එක්සත් ජාතික පක්‍ෂය ජාතික ආණ්ඩුවක් පිහිටුවීමේ පදනමේ සිට කැබිනට් මණ්ඩලයේ අමාත්‍යධූර සංඛ්‍යාව වැඩි කරන ලෙසට ඉල්ලා එම යෝජනාව ඉදිරිපත් කර තිබෙනවා.
කැබිනට් අමාත්‍යවරුන්ගේ සංඛ්‍යාව වැඩි කිරීමට සහ ආණ්ඩුවට සහය පළ කරන ශ්‍රී ලංකා නිදහස් පක්‍ෂයේ මන්ත්‍රීවරුන්ට අමාත්‍යධූර ලබාදීම සම්බන්ධයෙන් ජනාධිපතිවරයාගේ අකමැත්තක් මෙතෙක් ප්‍රකාශ කර නොමැති බව ද වැඩිදුරටත් සඳහන්.