තිස් වසරක යුද්ධයේ දී උතුරේ අතුරුදන්වූවන්ගේ ඥාතීන්ට වන්දි මුදලක් ලබා දීමට ආණ්ඩුවේ අවධානය යොමු වී ඇත.
අතුරුදන් වූවන්ගේ ඥාතීන් විසින් පසුගිය වසර කිහිපය පුරාම මේ පිළිබඳව විසඳුමක් ඉල්ලා උතුරු පළාතේ විවිධ ස්ථානවල උපවාස කරන උද්ඝෝෂණ පැවැත් වූහ.
අතුරුදන් වූවන් සඳහා විසඳුම් ඉදිරිපත් කිරීමට කොමිෂන් සභා දෙකක් ද පත් කර යෝජනා ඉදිරිපත් කර ඇත. එම යෝජනා අධ්‍යයනය කර විසඳුමක් ලෙස වන්දි මුදලක් ලබා දීමට ජනාධිපති ගෝඨාභය රාජපක්ෂගේ අවධානය යොමු වී තිබේ.
උතුරේ අතුරුදන් වූවන්ගේ පවුල් සංඛ්‍යාව එක්දහස් දෙසීයක් පමණ වන බව ගණන් බලා ඇත. ඔවුන් හමු වී සාකච්ඡා කිරීම සඳහා ජනාධිපතිවරයා මේ මස අවසානයේ යාපනයේ සංචාරයක නිරත වීමට නියමිතව ඇත. අතුරුදන් වූවන්ගේ ඥාතීන් සමග අමාත්‍ය ඩග්ලස් දේවානන්ද ද පසුගිය දා සාකච්ඡා පවත්වා විසඳුම් ලබා දීම පිළිබඳව අවධානය යොමු කර තිබේ. මෙම විසඳුම් සාර්ථක වුවහොත් මාර්තු මස පැවැත්වෙන එක්සත් ජාතීන්ගේ මානව හිමිකම් කොමිසමට දැනුම් දීමට ද ආණ්ඩුව තීරණය කර ඇත.