ලතින් අමෙරිකානු ගායකයෙකු වන එන්රික් ඉග්ලෙසියස් මෙරටට ගෙන්වා සංගීත ප්‍රසංගයක් සංවිධානය කළ ආයතනය අසාදු ලේඛනයට ඇතුළත් කරන බව කොළඹ මහනගර සභාවේ නගරාධිපති ඒ.ජේ.එම් මුසම්මිල් මහතා පවසයි.
ඔහු මේ බව පවසා සිටියේ අද (30 වැනිදා) පැවති මාධ්‍ය හමුවක් අමතමිනි.
මෙම ප්‍රසංගය සංවිධානය කර තිබුණේ ශ්‍රී ලංකා ක්‍රිකට් කණ්ඩායමේ සිටි ජ්‍යෙෂ්ඨ ක්‍රීඩකයින් දෙදෙනෙකු වන මහේල ජයවර්ධන හා කුමාර් සංගක්කාර අධ්‍යක්ෂවරුන් ලෙස කටයුතු කරන බව කියන ‘Live Events’ නැමැති ආයතනය විසිනි.
එම ආයතනය සංවිධානය කළ එම ප්‍රසංගයෙන් රුපියල් මිලියන 29ක පමණ බදු මුදලක් අහිමි වී ගිය බවත්, එම මුදල ගෙවීමට සති දෙකක් ලබාදෙන බවත්, මුදල ගෙව්වත් නැතත් එකී ආයතනය අසාදු ලේඛන ගත කරන බවත්, හෙතෙම අවධාරණය කළේය.
මුදල් නොගෙවන්නේ නම් නීතිමය පියවර ගැනීම ගැන අවධානය යොමු කරන බවද නගරාධිපතිවරයා පැවසුවේය.
අදාළ ප්‍රසංගයේදී අලෙවි කළ ප්‍රවේශපත්‍ර වලින් 7000ක පමණ කොළඹ මහනගර සභාවේ මූද්‍රාව ඇතත් තවත් ප්‍රවේශපත්‍ර 3000ක පමණ එම මූද්‍රාව නැති බවට සැක කරන බවද මෙම මාධ්‍ය හමුවේදී අනාවරණය කෙරිණ.