පොසොන් උත්සවය වාර්ෂික ජාතික උත්සවයක් සේ සැලකීම සහ මිහින්තලාවේ වාර්ෂික පොසොන් පෙරහැර සඳහා රාජ්‍ය අනුග්‍රහය ලබාදීමට රජය තීරණය කර තිබෙනවා.
ඊට අවශ්‍ය නෛතික කටයුතු කඩිනමින් සම්පාදනය කිරීමට අග්‍රාමාත්‍ය රනිල් වික්‍රමසිංහ මහතාගේ අවධානය යොමුව ඇති බවයි අග්‍රාමාත්‍ය කාර්යාලය නිවේදනය කළේ.
මිහින්තලය රජමහා විහාරාධිපති සහ එහි භාරකාර පූජ්‍ය වලවාහැංගුනවැවේ ධම්මරතන හිමිපාණන් විසින් අග්‍රාමාත්‍යවරයාගෙන් සිදුකෙරුණු ඉල්ලීමක් මත මෙය සිදුකෙරෙන බව සඳහන්.
එහිදී උන්වහන්සේ ඉල්ලීමක් කර ඇත්තේ මිහින්තලා විහාරයීය පූජා භූමිය ජාතික උරුමයක් ලෙස නම් කරන ලෙසයි.
ඒ සඳහා අග්‍රාමාත්‍යවරයාගේ උපදෙස් පරිදි ඉහළ පෙලේ කමිටුවක් ද පත් කිරීමටයි නියමිතව ඇත්තේ.
එම කටයුතු සම්බන්ධිකරණය සඳහා කෘෂිකර්ම, පශූ සම්පත් සංවර්ධන, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී.හැරිසන් මහතා මෙන්ම කාන්තා හා ලමා කටයුතු හා වියලි කලාප සංවර්ධන අමාත්‍ය චන්ද්‍රානි බණ්ඩාර මහත්මිය ද පත්කර ඇති බවයි අග්‍රාමාත්‍ය කාර්යාලය නිකුත් කළ නිවේදනයේ දැක්වෙන්නේ.