කටුනායක බණ්ඩාරනායක ජාත්‍යන්තර ගුවන්තොටුපොළේ ඉදිකෙරෙමින් පවතින නව පර්යන්ත ගොඩනැගිල්ලේ සදහා ඉදිකිරීමට සැලසුම් කර තිබූ දැවැන්ත නෙළුම් මලක හැඩැති වහලය ඉවත් කිරීමට කටයුතු කර තිබෙන බව වාර්තා වනවා. ගුවන් සේවා අමාත්‍ය අර්ජුන රනතුංග මහතාගේ නියෝගයකට අනුව මෙම නෙළුම් මල් ආකෘතිය සහිත වහලය සැලසුමෙන් ඉවත් කෙරන බවයි සදහන් වන්නේ.
අර්ජුන රණතුංග අමාත්‍යවරයා අදාළ ගොඩනැගිල්ලේ සැලසුම් පරීක්ෂා කර තිබෙන අතර එහි ඉංජිනේරුවන් විසින් පවසා තිබෙන්නේ එම නෙළුම් මල සහිත වහලය ඉදි කිරීමට මිලියන දෙදහස් දෙසීයක් ඇස්මේන්තු කර ඇති බවයි. එම නෙලුම් මල සහිත වහලය සංඛේතාත්මකව සහ අලංකාරය පිණිස ඉදිකරන බවත් ඒ සදහා විශේෂිත ලෝහ වර්ගයක් යොදා ගැනෙන බවත් ඔවුන් දන්වා ඇත. මෙම වහලය ගුවන්තොටුපලට යන එන අයට දැක ගැනීමට නොහැකිවන බවත් එය පෙනෙන්නේ ගුවන් නියමුවන්ට පමණක් බවත් ඔවුන් පවසා ඇත.
ඒ අනුව එම නෙළුම්මල් ආකෘතිය සහිත වහලය ඉදිකිරීම විශාල මුදලක් අපතේ යන එකක් වන බැවින් අදාල සැලසුමෙන් ඉවත් කිරීමට රණතුංග අමත්‍යවරයා විසින් නියෝග කරඇත.
පසුගිය රජය සමයේ ඉදිකිරීම් ඇරඹුණු මෙම නවීන පර්යන්ත ගොඩනැගිල්ලට මුල්ගල් තැබුණේ පසුගිය ඔක්තෝබර් මාසයේ මෙරටට පැමිණි ජපන් අගමැතිවරයා විසින්.