උප්පැන්න සහතික නිකුත් කිරීමේ දී සිංහල, දෙමළ, මුස්ලිම් වශයෙන් ජාතිය සටහන් කිරීම වෙනස් කර ශ්‍රී ලාංකික යනුවෙන් සටහන් කිරීම ආරම්භ කළ යුතු බව ස්වදේශ කටයුතු අමාත්‍ය වජිර අබේවර්ධන මහතා පවසයි.
ඊයේ (28) යාපනයේ චාවකච්චේරියේ දී පැවති උත්සවය ඒ මහතා සඳහන් කළේය.
ස්වදේශ කටයුතු අමාත්‍යාංශය මගින් පවත්වන ‘නිල මෙහෙවර’ ජනපති ජනතා සේවය ජාතික වැඩසටහනේ චාවකච්චේරි ප්‍රාදේශීය නිල මෙහෙවර අද ඩ්‍රිබර්ග් විද්‍යාලයේ දී පැවැත්විණි.
එහි දී අමාත්‍ය වජිර අබේවර්ධන අමාත්‍යවරයා මෙසේ පැවසීය.
”කෙනෙක් උපදින අවස්ථාවේ දී උප්පැන්න සහතිකයෙන් ම සිංහල, දෙමළ, මුස්ලිම් කියලා වෙන් කරනවා. මේ ක්‍රමය නැවැත්විය යුතුයි. මේ විෂය තියෙන්නේ අපේ අමාත්‍යාංශය යටතේ. අපි අනාගතයේ දී උප්පැන්න සහතිකයේ ශ්‍රී ලාංකික කියලා ලියන්න කටයුතු කරන්න ඕනෑ.
අපි ජාති වශයෙන් බෙදෙන්නේ නැතිව හැමෝම මනුස්සයන් හැටියට වැඩ කළොත් පමණයි මේ රට දියුණු කරන්න පුළුවන් වෙන්නේ. අපි ශ්‍රී ලාංකිකයන් විදියට සිතිය යුතුයි. ශ්‍රී ලාංකිකයන් විදියට කටයුතු කළ යුතුයි.