පසුගිය මාස කිහිපය සඳහා නිකුත් කළ විදුලි බිල්පත්වල යම් ගැටලුකාරී තත්ත්වයක් තිබේ ද යන්න පිළිබඳ ව ජනාධිපති ගෝඨාභය රාජපක්ෂ මහතා කරුණු විමසා තිබේ.
ඔහු මේ පිළිබඳ ව අද පැවති කැබිනට් රැස්වීමේදී විෂයභාර අමාත්‍ය මහින්ද අමරවීර මහතාගෙන් විමසා ඇති බව විදුලිබල හා බලශක්ති අමාත්‍යාංශය නිවේදනයක් නිකුත් කරමින් සඳහන් කරයි.
ඒ සම්බන්ධව ලංකා විදුලිබල මණ්ඩලය විසින් ජනතාවට කරුණු පැහැදිලි කළ යුතු බව අමාත්‍ය මහින්ද අමරවීර මහතා විසින් ලංකා විදුලි බල මණ්ඩලයට උපදෙස් දී තිබේ.
ඒ අනුව ලංකා විදුලිබල මණ්ඩලය පවසන්නේ විදුලි පරිභෝගිකයින්ට ලැබෙන නිවැරදිම බිල්පත වන්නේ අවසානයට නිකුත් කර ඇති බිල්පත බවය.
එය නිකුත් කරනු ලබන්නේ පාරිභෝගිකයින් පාවිච්චි කරන ලද විදුලි ඒකක ගණන සඳහා පමණක් බව විදුලිබල මණ්ඩලය පවසයි.
ලංකා විදුලි බල මණ්ඩලයේ සභාපති විජිත හේරත් මහතා කියා සිටියේ කිසියම් අයෙකුට පෙබරවාරි මාසයේ බිලට වඩා වැඩි අගයක් සහිත බිලක් ලැබී තිබෙන්නේ නම් එම බිල්පත වාරික කිහිපයකින් ගෙවීමට අවස්ථාව සලසන ලද බවය.
එම නිසා විදුලි බිල්පත වාරික වශයෙන් ගෙවීමට කටයුතු කළ ද කිසිදු නිවෙසක විදුලිය විසන්ධි කිරීමක් සිදු නොකරන බවත් ඔහු පවසා තිබේ.