කුරුණෑගල ශික්ෂණ රෝහලේදී මේවනවිට හඳුනාගෙන සිටින කොරෝනා වෛරසය ආසාදනය වූවන් පදංචිව සිටින සහ ඔවුන් ගැවසී ඇතැයි සැක කෙරෙන ප්‍රදේශ ආශ්‍රිතව වෙසෙන ජනතාවට ප්‍රවේශමෙන් සහ අවධානයෙන් කටයුතු කරන ලෙස වයඹ පළාත් සෞඛ්‍ය සේවා අධ්‍යක්ෂ වෛද්‍ය එන්.ෆරීඩ් මහතා කුරුණෑගල දිස්ත්‍රික්කයේ මහජනතාවගෙන් ඉල්ලා සිටියි.
පසුගිය 23 සහ 25 දෙදින තුළ හඳුනාගෙන සිටින වෛරසය ආසාදනය වූවන් 10 දෙනෙකුම නාවික හමුදාවේ සහ යුද හමුදාවේ සාමාජිකයින් සහ ඔවුන්ට සම්බන්ධ පවුල්වල සාමාජිකයින් බවද වෛද්‍ය ෆරීඩ් මහතා සඳහන් කළේය.
අනෙක් පිරිස වැලිසර නාවික හමුදා කඳවුරේ සේවය කරන නිවාඩු ලබා පැමිණි අයවලුන් වන අතර ඔවුන් වාරියපොළ බණ්ඩාර කොස්වත්ත , වාරියපොළ කනත්තේවැව , අලව්ව මහාරච්චිමුල්ල , පොල්ගහවෙල උඩවෙල සහ පොල්ගහවෙල ගිජිඳාගම පදිංචිකරුවන් වෙති.
මොවුන්ට අමතරව මහව නාගොල්ලාගම පදිංචි තවත් නාවික හමුදා සාමාජිකයෙකු කොරෝනා වෛරසය ආසාදනය වීමෙන් මේවනවිට අනුරාධපුර මහ රෝහලේ ප්‍රතිකාර ලබමින් සිටින බව වාර්තා වේ.
මෙම ආරක්ෂක අංශ සාමාජිකයින් තමන් පදිංචි ප්‍රදේශයන්හි ඇති වෙළඳසැල් , බැංකු ශාඛා , බැංකු ඒටීඑම් පද්ධති , සමූපකාර , සතොස , ඉන්ධන පිරවුම්හල් , සැලුන් , රාජ්‍ය ආයතන ඇතුළු විවිධ ස්ථාන වලට තම අවශ්‍යතා සඳහා ගොස් තිබෙන බව අනාවරණය වී ඇති බැවින් මෙම ප්‍රදේශ වල පිහිටි ප්‍රසිද්ධ ස්ථාන වල ගැවසීමෙන් වළකින ලෙසට වයඹ පළාත් සෞඛ්‍ය සේවා අධ්‍යක්ෂවරයා කියා සිටියි .