රට තුළ යළිත් ඉස්මතු වෙමින් පවතින බෙදුම්වාදය පරාජය කළ හැක්කේ මහින්ද රාජපක්ෂ මහතාට පමණක් බවත්, එම නිසා ඔහු යළිත් බලයට ගෙන ආය යුතු බවත් ජනතා සේවක පක්ෂයේ නායක සෝමවංශ අමරසිංහ මහතා පවසයි.
යුදමය වශයෙන් බෙදුම්වාදය පරාජය කිරීමට මහින්ද රාජපක්ෂ මහතා නායකත්වය ලබාදුන් අතර බෙදුම්වාදය නැවතත් හිස ඔසවමින් තිබෙන බව හෙතෙම පැවසීය. මේ තීරණාත්මක මොහොතේ එම භූමිකාව ඉෂ්ට කළ හැකි එකම නායකයා මහින්ද රාජපක්ෂ මහතා බවත් පැවසූ අමරසිංහ මහතා තමන්ද එතුමන් සමඟ වැඩ කිරීමට සූදානම් බව පැවසීය.
රට අවුලට ගොස්‌ ආණ්ඩුවක් නැති තත්ත්වයට පත්ව ඇති බවත් ඊට වත්මන් පාලකයන් වගකිව යුතු බවත් මේ තිබෙන අරාජික තත්ත්වයෙන් රට බේරා ගැනීමට මේ වේලාවේ මේ මහ පොළොවේ තිබෙන එකම බලවේගය ඒකාබද්ධ විපක්‍ෂය බවත් හෙතෙම සඳහන් කළේය.
රටේ ස්‌වාධීනත්වය, නිදහස භෞමික අඛණ්‌ඩතාව ආරක්‍ෂා කිරීමට කැපවී සිටින්නේ කවුද? ඉදිරියට එන්නේ මොන බලවේගයද එම බලවේගයත් සමඟ තමන් තවදුරටත් කැපවන බව සෝමවංශ අමරසිංහ මහතා වැඩිදුරට පැවසීය.