යෝජිත වරාය නගර කොමිෂන් සභාව මගින් සූදු ක‍්‍රීඩාව රටේ මූල්‍ය පාලනයට එකතු කිරීමට ආණ්ඩුව ක‍්‍රියා කරන බව හිටපු අගමැති රනිල් වික්රමසිංහ මහතා පැවසීය.
වැඩිදුරටත් අදහස් දක්වමින් රනිල් වික්රමසිංහ මහතා මෙසේද කීවේය.
ශ‍්‍රී ලංකාවට දීර්ඝ කාලීනව මූල්‍ය මධ්‍යස්ථානයක් හා මූල්‍ය සේවා ඇති කරන එකට කවුරුත් විරුද්ධ වන්නේ නෑ. එය කළ යුතු දෙයක්. ඒත් ඒ මුවාවෙන් සූදු පළ ඇති කිරීම, මුදල් විශුද්ධි කිරීම පිළබඳව අපට ප‍්‍රශ්න කිහිපයක් තිබෙනවා.
මූල්‍ය මධ්‍යස්ථාන එකපාරටම ආරම්භ වන්නේ නැහැ. ඒකට කාලයක් ගතවෙනවා. ඩුබායි, සිංගප්පූරුව හෝ ලෝකයේ කිසිම රටක් පැය 24 කින් මූල්‍ය මධ්‍යස්ථානයක් බවට පත්වුණේ නෑ. මූල්‍ය මධ්‍යස්ථාන ආරම්භ වෙන්න අවුරුදු 10 ක් 15 ක් යනවා. ඒ සෑම රටකම මූල්‍ය මධ්‍යස්ථාන පාලනය කරනු ලබන්නේ මහ බැංකුවෙන්. සිංගප්පූරුවෙත්, හොංකොං, මහා බි‍්‍රතාන්‍ය, නෙදර්ලන්තයේත් එහෙමයි. එයින් පිට සිදුවන්නේ නෑ.
මොරිසේ රටේ මහ බැංකුව එකතුවෙලා මූල්‍ය සේවා කොමිසම කියලා එකක් හැදුවා. එංගලන්තයේත් තිබුණා එහෙම එකක්. වාණිජ නීති නොතිබුණු ඩුබායි රට ජාත්‍යන්තර මූල්‍ය මධ්‍යස්ථානයක් කියලා කොමිසමක් ඇති කරලා වැඩ කළා.
මේ එක් රටක්වත් සූදු ක‍්‍රීඩාව ඇතුළු කළේ නෑ. ඩුබායි සූදුව තහනම් කළා. හොංකොං එහෙමයි.
මේ ළඟදී සිංගප්පූරුව කැසිනෝ ආයතන දෙකක් ඇති කළා. ඒ දෙක ඇති කළේ සංචාරක අධිකාරියයි, සංචාරක ප‍්‍රවර්ධන සභාවයි ආර්ථික සංවර්ධන මණ්ඩලයයි එකතු වෙලයි.
ඇයි ශ‍්‍රී ලංකාවේ මේක කරන්නේ කියන ප‍්‍රශ්නය තිබෙනවා. සූදුව සම්බන්ධයෙන් ඇයි අපි නීති නැති කරන්න යන්නේ. ලංකාවට කැසිනෝ අවශ්‍ය නම් කොළඹ හතරක්ම තිබෙනවා. පිටරට අය ඇවිල්ලා එහි කැසිනෝ ක‍්‍රීඩාව කළා කියලා කවුරුත් විරුද්ධ වෙන එකක් නෑ.
සමහරු කිව්වා ජාත්‍යන්තර මට්ටමේ කැසිනෝ ගේන්න කියලා. එහෙම කරන්න යනවා නම් පාර්ලිමේන්තුවේදී ජනතාව සහ ආගමික නායකයන් සමඟ කතා කළ යුතුයි. ඒ කාලයේ ඔස්ටේ‍්‍රලියාවේ පැකර්ව මෙහෙට ගෙනාවා කැසිනෝ ආරම්භ කරන්න.
ජේම්ස් පැකර් සුදුසු පුද්ගලයෙක් නොවෙයි කියලා එරට අධිකරණයෙන් කියලා තියෙනවා. මේක කළොත් ලංකාවේ ඕනෑම තැනක සූදු පළක් දාන්න පුළුවන්. ඔන්ලයින් සූදුව කරන්නත් හැකි වෙනවා. වරාය නගරයේ පමණක් නොවෙයි ජංගම දුරකථනයෙන් සූදු කී‍්‍රඩාව කරන්නත් පුළුවන්. සූදු පළ ඇති කරලා මුදල් විශුද්ධිකරණයටයි මේ අය ක‍්‍රියා කරන්න යන්නේ. ලෝකයේ බලවත්ම රටවල් මුදල් විශුද්ධිකරණයට තදින් ක‍්‍රියා කරන්න තීන්දුවක් ගත්තා. ඒ සඳහා බදු සහන දෙන රටවල්වලට විරුද්ධව ක‍්‍රියා කරන්නත් මේ රටවල් තීරණය කළා. මේ එකකටවත් අපේ රට අවධානය යොමු කරලා නෑ. කිසිම රටක සූදු ක‍්‍රීඩාවයි මූල්‍ය පාලනයයි එකතු කරලා නෑ. නමුත් මේ අය ඒක කරන්නයි යන්නේ. 2015 දී අපි බලයට එනකොට අපි මුදල් විශුද්ධිකරණය සිදුකරන රටක් ලෙස ඉහළින්ම හිටියා. නමුත් මට පුළුවන් වුණා එයින් ඉවත් වෙන්න. ජී. එස්. පී. ප්ලස් ලබාගන්නත් හැකිවුණා.
දේශීය ආර්ථිකයක් ඇතිකරනවා කියලයි මේ ආණ්ඩුවේ අය කිව්වේ. එය මුදල් විශුද්ධිකරණය ද කියලා අපි අහනවා. මට එකක් නම් කියන්න ඕනෑ. වියත්මග අවසන් වෙන්නේ සූදු පළකින් කියලයි.