වෘත්තීය විෂමාචාරයක් සම්බන්ධයෙන් නීතිඥවරයෙකුට මාස අටක කාලයක් නීතිඥවරයෙකු ලෙස කටයුතු කිරීම අත්හිටුවමින් ශ්‍රේෂ්ඨාධිකරණය අද නියෝගයක් නිකුත් කළා. ඒ, පාස්කු ඉරිදා බෝම්බ ප්‍රහාරය පිළිබඳ ජනාධිපති විමර්ශන කොමිෂන් සභාවේ දී (PCoI) පූජ්‍ය ගලගොඩඅත්තේ ඥානසාර හිමියන්ගේ සාක්ෂිය ජංගම දුරකථනයක් භාවිතයෙන් පටිගත කිරීමට උලමා සභාවේ මවුලවිට සහාය දීම හේතුවෙනි.
බුවනෙක අලුවිහාරේ, එස්.තුරෙයිරාජා සහ මහින්ද සමයවර්ධන යන ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් වගඋත්තරකාර නීතීඥ නිසාම් මොහොමඩ් ෂමීම් මාස අටක කාලයකට නීතීඥවරයෙකු කටයුතු කිරීම අත්හිටුවීමට නියෝග කළේය.
නීතීඥවරයාගේ වැඩ තහනම් කිරීම 2024 ජනවාරි 1 වැනිදා සිට ක්‍රියාත්මක වේ.
වගඋත්තරකාර පාර්ශ්වය නීතිඥවරුන්ගේ හැසිරීම සහ ආචාර විධිවලට අදාළ නීතිරීති උල්ලංඝනය කරමින් කටයුතු කර තිබේද යන්න සලකා බැලීම සඳහා ජනාධිපති කොමිෂන් සභාවේ සභාපතිවරයා මෙම කාරණය ශ්‍රේෂ්ඨාධිකරණය වෙත යොමු කර තිබුණි.
කෙසේ වෙතත්, පරීක්ෂණයේදී වගඋත්තරකාර නීතිඥවරයා වරද පිළිගත්තේය.
වගඋත්තරකාර නීතීඥවරයා 2020 සැප්තැම්බර් 9 වැනි දින පාස්කු ඉරිදා බෝම්බ ප්‍රහාරය පිළිබඳ විමර්ශනය කරන ජනාධිපති කොමිසම හමුවේ පවත්වන ලද නඩු විභාගයේදී සමස්ත ලංකා ජමියතුල් උලමා සභාව (ACJU) වෙනුවෙන් පෙනී සිටින ලදි.
උලමා සභාවේ මව්ලවි මුර්ශිඩ් මුලෆ්ෆර් (Moulavi Murshid Marsa Mullaffar) 2020 සැප්තැම්බර් 9 වන දින එහි වැඩබලන ලේකම්වරයා ලෙස ACJU නියෝජනය කරමින් කොමිෂන් සභාවෙහි කටයුතුවලට සහභාගී වෙමින් සිටියේය. මෞලවි මුල්ලෆ්ෆාර්ගේ ජංගම දුරකථනය නඩු විභාගය පැවැත්වෙන ස්ථානයට ගෙනයාම සහ එදින සාක්ෂි ලබාදෙමින් සිටි පූජ්‍ය ගලගොඩඅත්තේ ඥානසාර හිමියන්ගේසාක්ෂියෙන් කොටසක් පටිගත කිරීමට මවුලවි මුල්ලෆ්ෆර්ට උපකාර කිරීම සම්බන්ධයෙන් වගඋත්තරකාර නීතීඥවරයාට චෝදනා එල්ල වී තිබේ.
තම ජංගම දුරකථනය එම පරිශ්‍රයට රැගෙන යාමට අවසර නොමැති බැවින් එය ළඟ තබා ගන්නා ලෙස මවුලවි මුල්ලෆර් නීතිඥවරයාගෙන් ඉල්ලා ඇති බව අනාවරණය විය. එම පරිශ්‍රය තුළට ජංගම දුරකථන රැගෙන යාමට අවසර ලැබුණේ නීතිඥවරුන්ට පමණි.
1988 ශ්‍රේෂ්ඨාධිකරණයේ නීති 60 සහ 61 (නීතිඥවරයාගේ හැසිරීම සහ ආචාර විධි) උල්ලංඝනය කිරීම සම්බන්ධයෙන් වගඋත්තරකරුට එරෙහිව චෝදනා ඉදිරිපත් කර තිබුණි.
වගඋත්තරකරු වෙනුවෙන් ජනාධිපති නීතිඥ එන්.එම්.ෂාහීඩ් සමඟ ජනාධිපති නීතිඥ ෆයිස් මුස්තාපා සහ එම්.ඒ.සෙයිඩ් පෙනී සිටියහ. ශ්‍රී ලංකා නීතිඥ සංගමය වෙනුවෙන් චතුරිකා ඇල්විටිගල සමග ජනාධිපති නීතිඥ රොහාන් සහබන්දු පෙනී සිටියේය. නියෝජ්‍ය සොලිසිටර් ජනරාල් ගණග වාකිෂ්ඨ ආරච්චි මහතා නීතිපතිවරයා වෙනුවෙන් පෙනී සිටියේය.