සමහර කතා අසද්දී සිතෙන්නේ අබුද්ද කාලේ කියාය. අබුද්දස්ස කාලයේ ඇසුණු එවන් කතාවක් ගැන මේ ලියන්නේ එය හොඳද නරකද කියන්නට නොවේ. එහි හොඳ නරක ගැන තීරණය කළ යුතු ඔබ විසින්මය. යන්තම් වයස අවුරුදු 14 ක් වු තම එකම දියණිය ප්‍රදේශයේ රෝහලකට රැගෙන ගොස් කෙටි කාලීන වදසැත්කමක් කරවා වයස අවුරුදු 22 තරුණයකුට නාමිකව පාවා දුන් නරුම මවක් පිළිබද අම්පාර, උහන පොලීසිය වාර්තා වෙයි.
අම්පාර දිස්ත්‍රික්කයේ උහන ප්‍රාදේශීය ලේකම් කොට්ඨාශයේ පිහිටි ලාතුගල නම් ගම්මානය උණ සංවර්ධිත අඩුආධායම් ලාභී පවුල් වලින් සමන්විත ඉතා දුෂ්කර ගම්මානයකි. මෙහි උපත ලද ඇයට අපි රූපිකා යැයි කියමු. ප්‍රදේශයේ එක්තරා මහා විද්‍යාලයක 9 වසරේ ඉගෙනුම ලැබු 14 හැවිදිරි රූපිකා නිතර මී මැසු මොර රෝගයෙන් පෙලුන හෙයින් විදුහලේ විදුහල්පතිවරයා රූපිකාගේ මව ගෙන්වා රූපිකාගේ ආරක්ෂාව පතා ඇය පදිංචි ගමේ පාසලට ඇතුළත් කරන ලෙසයි.
ඒ අනුව මව විසින් රූපිකා එම පාසලෙන් අස්කරවා ගමේ පාසලට ඇතුළු කිරීමට උත්සාහ ගෙන ඇතත් ගමේ විදුහල්පතිවරයා පවසා ඇත්තේ ඇය පාසලට භාර ගැනීමට නම් ඇගේ ආරක්ෂාව පතා වැඩිහිටියකු පාසලට එවිය යුතු බවයි.
කුලී වැඩ කරන රූපිකාගේ මව එය කළ නොහැකි නිසා රූපිකාගේ පාසල් ගමන එතකින් අවසන් කළේය.
පසුව 2019 වසරේ දිනක රූපිකාගේ දුරකථනයට ලැබුණු මිස්කොල් එකකින් හඳුනාගත් තණමල්විල ප්‍රදේශයේ 22 හැවිදිරි පුද්ගලයකු සමඟ ටික කලක් තිස්සේ දුරකථන ප්‍රේම සම්බන්ධයක් ඇති කරගෙන ඇත. රූපිකා දුරකතනයෙන් නිතර නිතර කතා කරන අයුරු දුටු මව ඒ පිළිබද දියණියගෙන් ප්‍රශ්න කර ඇත.
එහිදි රූපිකා තම ප්‍රේම සම්බන්ධය පිළිබඳ විස්තර මවට පවසා ඇත. එහිදි මව උපදෙස් දී තිබුණේ එම තරුණයා නිවසට කැඳවන ලෙසයි. ඒ අනුව තරුණියගේ දැන්වීම මත එම තරුණයා 2020.08.01 වන දින රූපිකාගේ නිවසට පැමිණ තිබේ. ඔහු හා කළ කතාබහේදී තරුණයා රැකියාවක් කරන බව දැනගත් බැවින් මව එක පයින් එම සම්බන්ධයට කැමැත්ත දුන්නේය.
තරුණයා ආපසු ගිය පසු මව කළේ සිය දියණිය ප්‍රදේශයේ රෝහලකට කැඳවාගෙන ගොස් කෙටිකාලීන පවුල් සැලසුම් සැත්කමක් කරවීමයි.
පසු දිනක මවගේ අනුදැනුම මත තණමල්විල තරුණයා නිවසට පැමිණ නතර වී ඇති අතර දෙදෙනා අඹුසැමියන් ලෙස ජීවත් වී ඇත.
මාසයක් පමණ කල් ගත වීමෙන් පසු මවගේ උපදෙස් පරිදි එම වත්තේම කොනක කටුමැටි ගසා පොල්අතු හෙවිලි කළ ගෙපලක් තැනීමට තරුණ අඹු සැමි යුවළ පටන් ගෙන තිබේ.
මේ අතර තුර රූපිකාගේ පියා විසින් ඔවුන්ගේ සම්බන්ධයට තදින්ම විරුද්ධ වී ඇති අතර ඉබාගාතේ පැමිණි තරුණයා සමග දීග කෑමට දියණියට ඉඩ නොදෙන ලෙසත් ඔහුව නිවසින් පන්නා දමන ලෙසත් බිරිදට දන්වා ඇති නමුත් මව එය කිසිවක් ගනන් නොගෙන අලුතින් හදන නිවසේ දෙදෙනා පදිංචි කර වීමට කටයුතු කර ඇත.
මින් දැඩි කෝපයට පත් පියා උහන පොලීසියට ගොස් සියල්ල හෙළි කරමින් පවසා ඇත්තේ සිය බිරිද තම බාල වයස්කාර දියණියව විවාහ කර දීමට කටයුතු කරන බවයි.
මේ අනුව ක්‍රියාත්මක වු උහන පොලීසියේ ස්ථානාධිපති ප්‍රධාන පොලිස් පරික්ෂක එල්. බී. එම් කරුණාරත්න අම්පාර ජ්‍යෙෂ්ඨ පොලිස් අධිකාරි ජයන්ත රත්නායක සහ සහකාර පොලිස් අධිකාරි ටී.එම් ජයරත්න දැනුවත් කර ඔවුන්ගේ උපදෙස් මත වැඩ බලන පොලිස් පරික්ෂක සරත් විදානහේවා අපරාද අංශයේ ස්ථානාධිපති උ.පො.ප ලලිත් සමරවීර ළමා හා කාන්තා කාර්යංශයේ ස්ථානාධිපති ෂර්මිලා ඉරෝෂණි ගාල්ලගේ පො.සැ 5494 රාජපක්ෂ ආ.පො.කො 61993 උෂාන්ති සහ අ.පො.කො සුදම්මිකා 10237 යන නිලධාරීන් ලවා පරීක්ෂණයක් පැවැත්වීමයි.
ඒ අනුව පරික්ෂණ පැවැත්වූ පොලිස් කණ්ඩායම් බාල වයස්කාර රූපිකා දූෂණයට කළ බව කියන තණමල්විල, නදිනීගල පදිංචි 22 හැවිදිරි යු.ඩබ් නාමල් සදරුවන් යන අය ඊට පූර්ණ ආධාර හා අනුබල දුන් රූපිකාගේ මව වන ආර්.වී. රසිකා (35) යන අයත් අත්අඩංගුවට ගෙන මේ වන විට රක්ෂිත බන්ධනාගාර ගත කර තිබේ.
අවුරුදු 14ක් යනු පෙර යොවුන් අවදියයි. ඉගෙන ගත්තේ නම් ඇය තවමත් 10 වසරේය. බාල වයස්කාර දරුවන්ට මේ කිසිවෙක් නොතේරුණමුත් වැඩිහිටියන් මේ වැනි දේට අනුබල දීමෙන් කරන්නේ දරුවන්ගේ ජීවිත අඳුරු කිරීමය.