තමා ජනාධිපතිවූ පසු සියළු ගොවීන්ට භේදයකින් පොහොර නොමිලේ ලබා දෙනවා සේම ඉප‍ලෝගම රණවිරු ගම්මනයේ නිවාස ලබා දීම සඳහා රණවිරුවන්ගෙන් අය කළ මුදල් යළි ලබා දීමට කටයුතු කරන බව නව ප්‍රජාතන්ත්‍රවාදී පෙරමුණේ ජනාධිපතිධූර අපේක්ෂක සජිත් ප්‍රේමදාස මහතා ඊයේ (17) ප්‍රකාශ කළේය.
ජනාධිපතිවරණය වෙනුවෙන් කැකිරාව, තඹුත්තේගම, මිහින්තලේ හා බටහිර අනුරාධපුර යන නගරවල පැවැති ජනරැළි අමතමින් සජිත්
“මගේ ප්‍රතිවාදියා තමන්ගේ අයියාගෙන් අසා පොරොන්දුවක් දී තියෙනවා නොමිලේ පොහොර දෙනවා කියලා. පොහොර නිකං දෙනවා කියන කොට ගොඩ බෝග වගා කරුවා අමතක වුණා එළවළු වගා කරන පුද්ගලයා අමතක වුණා. පළතුරු වගා කරන පුද්ගලයා අමතක වුණා. වී සඳහා සහතික මිලක් දිය යුතුය කියන කාරණය අමතක වුණා.
සජිත් ප්‍රේමදාසගේ කෘෂිකාර්මික වැඩපිළිවෙල මම ඉදිරිපත් කරන්න කැමතියි. වී මිළ රුපියල් 50 තත්ත්වයට කට වචනයෙන් නොව පාර්ලිමේන්තුවේ අනපනත් හරහා ගෙන එන්න කටයුතු කරනවා. පොහොර ලබාදීම එක ගොවියන් පිරිසකට සිමා නොකර වී ගොවියාට වගේම එළවළු ගොවියාට, පළතුරු ගොවියාට වගේම සෑම ගොවියෙකුටම නොමිලේ පොහොර ලබා දෙනවා.
අපි ගොවියන් අතර බේද බින්න වීම් ඇති කරන්නේ නැහැ. ගොවියා ගොවියාමයි. හැම ගොවියෙකුටම එක හැන්දෙන් සලකනවා. මගේ ප්‍රතිවාදියට අමතක වුණ සෑම ගොවියෙකුටම මම පොහොර නොමිලේ ලබා දෙනවා. ඒ ගැන කිසිදු සැකයක් තියා ගන්න එපා.”