අධිකරණ නියෝග කඩ කිරීම, පොලිසියේ රාජකාරියට බාධා කිරීම ඇතුළු චෝදනා යටතේ රිමාන්ඞ් භාරයේ සිටි ආර්ථික කර්මාන්ත හා සමාජ සුබ සාධන නියෝජ්‍ය අමාත්‍ය පාලිත තෙවරප්පෙරුම මහතා ඇතුළු පස් දෙනකු රුපියල් ලක්ෂ දෙක බැගින් වූ ශරීර ඇප දෙකක් මත මුදාහරින ලෙස මතුගම ප‍්‍රධාන මහෙස්ත‍්‍රාත් නීතා හේමමාලි හාල්පන්දෙනිය මහත්මිය ඊයේ (16 දා) සවස නියෝග කළාය.
මතුගම මහෙස්ත‍්‍රාත් අධිකරණයේ නියෝගයක් මගින් තහනම් කළ තෙබුවන ගල්කන්දගොඩ ප‍්‍රදේශයේ ඉඩමක මළ සිරුරක් වළ දමමින් අධිකරණ නියෝග කඩ කිරීම, අධිකරණයට අපහාස කිරීම, අධිකරණ නියෝගය භාරදීමට ගිය තෙබුවන පොලිසියේ නිලධාරීන්ගේ රාජකාරියට බාධා කිරීම යන චෝදනා යටතේ පසුගිය 10 දා නියෝජ්‍ය ඇමැතිවරයා රක්‍ෂිත බන්ධනාගාරගත කිරීමට මතුගම ප‍්‍රධාන මහෙස්ත‍්‍රාත්වරිය නියෝග කළාය.
ඇපකරුවන්ගෙන් එක් අයකු මතුගම අධිකරණ බල ප‍්‍රදේශයේ අයකු විය යුතු බවටත් දෙසැම්බර් 10 දා නැවත නඩුව විභාගයට ගැනීමටත් මහෙස්ත‍්‍රාත්වරිය නියෝග කළාය. අධිනීතිඥ ගාමිණී නල්ලපෙරුම, සුනෙත් හපුහෙට්ටි, පුෂ්පකුමාර අමුගොඩ යන මහත්වරුන් ඇතුළු නීතිඥ පිරිසක් නියෝජ්‍ය ඇමැතිවරයා වෙනුවෙන් කරුණු දැක්වූහ.