පසුගිය දශක දෙක ඇතුළත ශ්‍රී ලංකාවේ සිදුවූ ඛේදවාචක තුනක් ඇති බවත්, ඉන් එකක් සුනාමි ඛේදවාකය බවත්, දෙවන එක මහ බැංකු මංකොල්ලය බවත්. තුන්වන ඛේදවාචකය අගමැති රනිල්ගේ ආශිර්වාදයෙන් මංගල සමරවීර මහතා ජිනාවාහිදී රටත්, ජාතියත් රණවිරුවනුත් පාවා දෙමින් අැමරිකානු යෝජනාවට සම අනුග්‍රහය දැක්වීම බවත් පාර්ලිමේන්තු මන්ත්‍රී විජේදාස රාජපක්ෂ මහතා පවසයි.
කොළඹදී පැවති මාධ්‍ය හමුවක් අමතමින් ඒ මහතා වැඩිදුරටත් මෙසේ කියා සිටියේ ය.
‘අපේ රටේ රණවිරුවො යුද අපරාධ අධිකරණයට ගෙනියන්න දෙමුහුම් අධිකරණයක් ඕනයි කියල ජිනීවා මානව හිමිකම් කොමිසන් සභාවට ඇමරිකා එක්සත් ජනපදය යෝජනාවක් ගේනකොට මංගල සමරවීර මහත්තයා පැනල අත් දෙකම ඉස්සුවා.
මම ලිඛිතවම දුන්නා, තානාපතිට මේක අපේ ආණ්ඩුක්‍රම ව්‍යවස්ථාවට විරුද්ධයි කියල. අමාත්‍ය මණ්ඩලයේ අනුමැතියක් නැතිව, රටත් සොල්දාදුවොත් පාවා දීල ආවා මංගල සමරවීර මහත්මයා විදේශ කටයුතු ඇමතිවරයා ලෙස. මංගල සමරවීර මහත්තයා මේ කරපු දේ එංගලන්තෙ ඇමති කෙනෙක් කරානම් ඉන්දියාවෙ ඇමතිකෙනෙක් කරානම් දේශද්‍රෝහී චෝදනාව යටතේ මේ වෙනකොටත් අත්අඩංගුවට අරන්. මෙහෙම රටක් පාවා දෙන්න මංගල සමරවීරට කවුද බලපත්‍රයක් දුන්නෙ.
අපි කාටත් වගකීමක් තියනව අපේ රටේ ස්වාධිපත්‍ය, ගෞරවය ආරක්ෂා කරන්න. ඒක මේ ආණ්ඩුවෙන් වෙයි කියල බලාපොරොත්තු වෙන්න එපා. තව අවුරුදු 100ක් යනකල් සමරන්න තියන ජාතික ශෝක දිනයක්.