6.5% බස් ගාස්තු සංශෝධනයක් කිරීම සදහා කැබිනට් මණ්ඩලය අනුමැතිය ලබා දුනනත් ඉන් ඔබ්බට ගොස් 12.5% ක බස් ගාස්තු සංශෝධනයක් හා රුපියල් 12 දක්වා අවම බස් ගාස්තුව වැඩිකිරීම සදහා නියෝජ්‍ය ප්‍රවාහන ඇමතිවරයා විසින් කටයුතු කිරීම බස් ගාස්තු සංශෝධනය කිරීමේ ජාතික ප්‍රතිපත්තියට එරෙහිවයාමක් බව පාරිභෝගික අයිතිවාසිකම් සුරැකීමේ ජාතික ව්‍යාපාරයේ සභාපති රංජිත් විතානගේ මහතා පවසනවා.
මාධ්‍ය නිවේදනයක් නිකුත් කරමින් ඒ මහතා සඳහන් කර සිටින්නේ, බස් ගාස්තු සංශෝධනයක් සදහා සාධක 12 ක් සලකා බලන බවයි. ඒනම් ඉන්ධන මිල, සේවක වැටුප්, දැවිතෙල් හා සේවා, ටයර්,අලුත් වැඩියා,දෛනික වියදම්,මාසික වියදම්,වාර්ෂික වියදම්,ක්ෂවීම්,ෆිනෑන්ස් සේවා හා වගකීම යන ආදියයි.මෙම සාධක වල වෙනස්වීම අනුව අදාල සංශෝධන කරනු ලබයි.
නැවත බස් ගාස්තු සංශෝධනයක් කල හැක්කේ ජූලි මාසයේ වන බැවින් එම සංවිධානය රජයෙන් ඉල්ලා සිටින්නේ බස් ගාස්තු සංශෝධනය වහා හකුලා ගන්නා ලෙසය. එසේ නොකළ හොත් සමස්ත මගී ජනතාව වෙනුවෙන් අධිකරණයේ පිහිට පැතීමට සූදානම් බවත් එම සංවිධානය අවධාරණය කර සිටිනවා.
දේශපාලකයන්ට අවශ්‍ය ආකාරයට බස් ගාස්තු සංශෝධනයක් කිරීමට නම් ජාතික ප්‍රවාහන කොමිසමක් නඩත්තු කරන්නේ ඇයිද? යන්න රන්ජිත් විතානගේ මහතා රජයෙන් ප්‍රශ්න කර සිටිනවා.