නව ව්‍යවස්ථාව ගෙන ඒමට සහ පසුගිය පාලන සමයේ අපරාධ සම්බන්ධයෙන් චෝදනා ලැබූ ප්‍රභූන් අත් අඩංගුවට ගැනීම වළක්වමින් ජනාධිපතිවරයා තහංචි දමන බව නව සමසමාජ පක්ෂයේ නායක වික්‍රමබාහු කරුණාරත්න පවසයි.
ශ්‍රී ලංකාව සදහා නව ආණ්ඩුක්‍රම ව්‍යවස්ථාවක් සකස් කිරීමේ මුලික කටයුතු සිදු කර තිබුනද එය ඉදිරියට ගෙන යාමේ කටයුතු ජනාධිපති මෛත්‍රිපාල සිරිසේන විසින් වලක්වා ඇති බව හෙතෙම චෝදනා කර සිටී.
“ව්‍යවස්ථාව ඉදිරියට ගෙන යාමට තහංචිය දාලා තියෙන්නේ මේ තක්කඩියාම තමයි,” යනුවෙන් වික්‍රමබාහු කරුණාරත්න සදහන් කළේ කොළඹ මහ නගර සභා මැතිවරණයට කොඩි දෙක ලකුණින් ඉදිරිපත් වි සිටින යහපාලනය සදහා වු ජාතික පෙරමුණේ අවසන් මැතිවරණ රැස්වීම බදාදා 7 කොළඹදී අමතමිනි.
පසුගිය සමයේ රටේ සිදුවු අපරාධ සම්බන්ධයෙන් පොලිසිය විසින් අනාවරණය කරගනිද්දී එම පරීක්ෂණ නවත්වන ලෙස බලපෑම් කරන්නේ ජනාධිපතිවරයා විසින් බවට ද ආචාර්ය වික්‍රමබාහු කරුණාරත්න එහිදී චෝදනා කළේය.