මල්වතු හා අස්ගිරි මහා නාහිමිවරුන් විසින් ප්‍රකාශ කරන්නේ රටේ ජනතාවගේ මතය බවත්, එම මතයට ගරු කළ යුතු බවත්, කිසිම අයුරකින්වත් උන්වහන්සේලා ලබා දෙන අවවාද අනුශාසනා පිළිනොගෙන සිටීමට නොහැකි යැයි මධ්‍යම පළාත් ආණ්ඩුකාර නිලූකා ඒකනායක මහත්මිය පැවසීය.
ගලේවෙල අධ්‍යාපන කළාපයට අයත් දිවුල්ගස්කොටුව ප්‍රථමික විදුහලේ පැවති උත්සවයකින් අනතුරුව මාධ්‍ය හමුවේ අදහස් දක්වමින් ඇය මේ බව කියා සිටියාය.
ජාතියක් හැටියට නැඟී සිටීම සඳහා භික්ෂූන් වහන්සේ ලබාදෙන අවවාද අනුශාසනා පිළිපැදිය යුතු බවය. මහ සංඝරත්නය ඉල්ලන්නේ රටේ යහපත බවත් පොදු ජනතාවගේ මතය බවත් ඇය සඳහන් කළාය. ජනාධිපතිවරයාගේ එකම බලාපොරොත්තුව ජනතා පරමාධිපත්‍ය ස්ථාපිත කිරීම බවත් ජනාධිපතිවරයා මහ නායක ස්වාමීන් වහන්සේගේ ගෞරවනීය ඇරයුම ඉතාම ආදරයෙන් ගෞරවයෙන් යුතුව පිළිඅරගෙන අවසන් බවද ඇය වැඩිදුරටත් සඳහන් කළාය.