උතුරු කොරියාවේ න්‍යෂ්ඨික අත්හදාබැලීම් ස්ථානයක් අසල අද පෙරවරුවේ රිච්ටර් මාපකයේ 6.3ක ප්‍රබලතාවයකින් යුතු භූමි කම්පාවක් සිදුවී තිබෙනවා.
පියෝයෑන්ග් පාලනය හයවන න්‍යෂ්ඨික අත්හදා බැලීම සිදු කරන්නට ඇති බවත්, භූමිකම්පාවට හේතුව එය වීමට ඉඩ ඇති බවත් දකුණු කොරියානු පුවත් සේවා වාර්තා කර ඇත.
චීනයේ භූවිද්‍යා නිරීක්ෂණ ඒකකයද ඊසාන දිග උතුරු කොරියාවේ භූ කම්පනයක් සිදුව ඇති බවට ප්‍රකාශ කර ඇති අතර එය “සැකකටයුතු පිපිරිමක්“ යැයි ඔවුන් හදුන්වා තිබේ.
මේ සමගම ඇමරිකාව හා උතුරු කොරියාව අතර ඇවිලෙමින් පැවති න්‍යෂ්ඨික අර්බුධය තවත් උත්සන්න වනු ඇති බවට ජාත්‍යන්තර මාධ්‍ය වාර්තා පවසන අතර, අද පෙරවරුවේ ඇතිවූ සිදුවීම සම්බන්ධයෙන් පෙන්ටගනය විශේෂ සාකච්ඡාවක් කැදවා ඇති බවද පැවසේ.
දකුණු කොරියානු ජනාධිපතිවරයාද සිය ආරක්ෂක කවුන්සිලය හදිසියේ රැස්කර ඇති බවත්, න්‍යෂ්ඨික අත්හදාබැලීම් සම්බන්ධයෙන් උතුරු කොරියාවට චෝදනා කර ඇති බවද එම වාර්තා පවසයි.
මේ අතර හයිඩ්‍රජන් බෝම්බයක් ලෙස සැළකෙන බැලිස්ටික් මිසයිලයක රැදවිය හැකි වඩාත් දියුණු න්‍යෂ්ටික අවියක් තමන් නිෂ්පාදනය කර ඇති බව උතුරු කොරියාව ප්‍රකාශ කර තිබිණි.