ඉදිරියේදී ඉදිරිපත් කිරීමට යෝජිත නව ආණ්ඩුක්‍රම ව්‍යවස්ථාවේ රහස් කරුණු ඇතුළත් නොවන බවත් එය පාර්ලිමේන්තුවට ඉදිරිපත් කර මැති ඇමති 225 දෙනාගේම ඒකමතික තීරණයක් අනුව සම්මත වන ව්‍යවස්ථාවක් බවත් මහ නගර සංවර්ධන අමාත්‍ය පාඨලී චම්පික රණවක මහතා පවසයි.
ඇමතිවරයා මේ බව පැවසූයේ මල්වතු පාර්ශවයේ මහා නායක අතිපූජ්‍ය තිබ්බොටුවාවේ ශ්‍රී සුංමගල නාහිමියන් පෙරේදා (10) හමුවූ අවස්ථාවේදීය.
නව ව්‍යවස්ථාව සකස් කරන්නේ මහජනයාගේ අදහස් අනුව බවත්, ජනමත විචාරණයකට තුඩු දෙන කිසිදු කරුණක් ව්‍යවස්ථාවට අතුළත් නොකළ යුතු බවට අගමැතිවරයා උපදෙස් ලබා දී තිබෙන බවත් අමාත්‍යවරයා මහ නාහිමියන් හමුවේ පැවසීය.
ඉදිරිපත් කිරීමට යෝජිත නව ව්‍යවස්ථාව සම්බන්ධයෙන් ඇතැම් කොටස් අසත්‍ය ප්‍රකාශ කරමින් සිටින බවත්, බුද්ධාගමට, ජාතික ගීයට සහ ජාතික කොඩියට ව්‍යවස්‌ථාවලින් මෙතෙක්‌ ලබාදී තිබුණු ස්‌ථානයේ කිසිම වෙනසක්‌ සිදු නොවන බවත් අමාත්‍යවරයා එහිදී අනාවරණය කළේය.