යෝජිත නව ව්‍යවස්ථාව තුළින් ශ්‍රී ලංකාව අනාගමික රාජ්‍යයක් වශයෙන් නොව බහු ආගමික රාජ්‍යයක් ලෙස නම් කිරීම සුදුසු බව සමාජයීය සහ සාමයික කෙන්ද්‍රයේ ඔස්වල්ඩ් ෆර්ත් පූජකවරයා පවසන බව බී.බී.සී. ලෝක සේවය කියයි.
නව ව්‍යවස්ථාව සැකසීමේදී බුදු දහමට ව්‍යවස්ථාව තුළින් ලබාදී ඇති අයිතිය එලෙසින්ම සුරැකිය යුතු බවට කාදිනල් මැල්කම් රංජිත් පියතුමා විසින් සිදු කරන ලද ප්‍රකාශයට පිළිතුරු වශයෙන් ෆර්ත් පූජකවරයා මෙසේ පවසා ඇත.
ශ්‍රී ලංකා රාජ්‍යය බුද්ධාගම පෝෂණය කර ආරක්ෂා කිරීමට බැඳී සිටින බවට ආණ්ඩුක්‍රම ව්‍යවස්ථාවේ 09 වැනි වගන්තිය නව ව්‍යවස්ථාවටත් ඇතුලත් විය යුතු යයි මැල්කම් රංජිත් කාදිනල්වරයා පසුගියදා කළ ප්‍රකාශයට දැඩි විරෝධය පළකරමින් ෆර්ත් පූජකවරයා ඇතුළු කතෝලික ප්‍රජා නායකයන් 99 දෙනකුගේ අත්සනින් නිවේදනයක්ද නිකුත් කර තිබුණු බවද බී.බී.සී.ය කියයි.
බහු ආගමික, බහු සංස්කෘතික පරිසරයක් ඇති රටක් තුළ එක් ආගමකට පමණක් ප්‍රමුඛත්වයක් ලබා දීම වර්තමාන සමාජයට නොගැළපෙන්නේ යැයිද පූජකවරයා පැවසූ බවද බී.බී.සී.ය වැඩිදුරටත් කියයි.