ඇවන්ගාඩ් සමාගමට අයුතු ලෙස අධික ලාභයක් ලබාගැනීමට ඉඩකඩ සලසමින් පාවෙන අවි ගබඩාවක් පවත්වාගෙන යාමට අවසර ලබා දීමෙන් රජයට රුපියල් බිලියන 11.4ක අලාභයක් සිදුකළේ යැයි චෝදනා කරමින් අල්ලස් හෝ දූෂණ විමර්ශන කොමිසම විසින් හිටපු ආරක්ෂක ලේකම් ගෝඨාභය රාජපක්ෂ මහතා සහ හිටපු නාවික හමුදාපතිවරුන් තිදෙනෙකු ඇතුළු අට දෙනෙකුට එරෙහිව ඊයේ (31) කොළඹ ප්‍රධාන මහේස්ත්‍රාත් අධිකරණය හමුව් නඩු පවරනු ලැබීය.
එකී අවසරය ලබාදීම නිසා 2012.08.08 හා 2015.01.08 කාලය තුළදී රජයට එම අලාභය සිදුවූයේ යැයි අල්ලස් හෝ දූෂණ විමර්ශන කොමිෂන් සභාව විසින් ගොනු කළ නඩුව මගින් අධිකරණයට පෙන්වා දී තිබේ.
හිටපු ආරක්ෂක ලේකම් ගෝඨාභය රාජපක්ෂ, අතිරේක ලේකම් සුජාතා දමයන්ති, පාලිත පියසිරි ප්‍රනාන්දු, කරුණාරත්න බණ්ඩාර අධිකාරි, විශ්‍රාමික හිටපු නාවික හමුදාපති සෝමතිලක දිසානායක, ඇවන්ගාඩ් සමාගමේ සභාපති නිශ්ශංක යාපා සේනාධිපති, විශ්‍රාමික නාවික හමුදාපති ජයනාත් සිරිකුමාර කොළඹගේ හා විශ්‍රාමික නාවික හමුදාපති ජයන්ත පෙරේරා එම නඩුවේ සැකකරුවෝ වෙති. එම නඩුව අද (01) කොළඹ ප්‍රධාන මහේස්ත්‍රාත් ගිහාන් පිලපිටිය මහතා ඉදිරියේදී කැඳවීමට නියමිතය.