ජාත්‍යන්තර මූල්‍ය අරමුදලේ වැඩසටහන ඉදිරියට ගෙනයාමට නම් ක්‍රම ක්‍රමයෙන් රජයේ බදු ආදායම් වැඩිකර ගත යුතුව ඇතැයි පේරාදෙණිය විශ්වවිද්‍යාලයේ ශාස්ත්‍ර පීඨ පශ්චාත් උපාධි ආයතනයේ අධ්‍යක්ෂ ආර්ථික විද්‍යාඥ මහාචාර්ය වසන්ත අතුකෝරාල මහතා පවසයි.
මෙවර යෝජනා කරන ලද බදු සංශෝධන අනුව සමහර පැතිවලින් රජයට යම් ආකාරයකට බදු ආදායම් අහිමිවෙන බවත් ඒ මහතා පෙන්වා දෙයි.
“ජාත්‍යන්තර මූල්‍ය අරමුදලේ වැඩසටහන ඉදිරියට ගෙනයාමට නම් ක්‍රම ක්‍රමයෙන් රජයේ බදු ආදායම් වැඩිකර ගතයුතුව තියෙනවා. එය මූලික අවශ්‍යතාවක්. මොකද ඒ ඒ වර්ෂ වන විට රජයේ අයවැය හිඟය හා ප්‍රාථමික ගිණුමේ ශේෂය කුමන මට්ටමකින් පවත්වාගෙන යා යුතුද, රජයේ බදු ආදායම කුමන අපේක්ෂිත මට්ටමක් කරා ගමන් කළ යුතු ද ආදී කාරණා පිළිබඳව ජාත්‍යන්තර මූල්‍ය අරමුදල නිශ්චිතව සඳහනක් කරලා තියෙනවා. ඒ නිසා බදු ආදායම්වලට දැඩිව බලපෑම් එල්ල වන ලෙසින් තමන්ට වුවමනා ආකාරයට කටයුතු කිරීමට රජයට හැකියාවක් ලැබෙන්නේ නැහැ.
මෙවර යෝජනා කරන ලද බදු සංශෝධන අනුව සමහර පැතිවලින් රජයට යම් ආකාරයකට බදු ආදායම් අහිමිවෙනවා. විශේෂයෙන්ම පුද්ගලික ආදායම් බදු සඳහා යම් සහන ලබාදීම සඳහා කටයුතු කරලා තියෙනවා. මින් පෙර පෞද්ගලික ආදායම් බදු අය කළේ මාසයක ආදායම රුපියල් ලක්ෂයකට වඩා වැඩි ආදායම් පවතින අයගෙන් පමණයි. පසුව ලක්ෂ පහෙන් පහට තමයි බදු ප්‍රතිශතයන් ක්‍රියාත්මක වුණේ. දැන් එක් ලක්ෂ පනස් දහසට වඩා වැඩි ආදායම් ලබන අයගෙන් පමණක් එම බදු අයකර ගැනීමටයි තීරණය කරලා තියෙන්නේ.
අලුත් සංශෝධනයන් තුළ පෙර පැවැති පළමු ලක්ෂ පහ වෙනුවට දැන් ලක්ෂ දහය සඳහා සියයට හයක බදු අය කිරීම සඳහාත් නිර්දේශ කරලා තියෙනවා. මේ ලෙසින් රටේ ජනතාවට විශේෂයෙන්ම වෘත්තිකයන් ආදීන්ට සහන ලබාදීම නිසා රජයේ බදු ආදායම සැලකිය යුතු මට්ටමකට අඩුවෙන්න පුළුවන්. ඇත්තටම මේ නිසා රජයේ බදු ආදායම බිලියන හතළිහක් පනහක් අතර ප්‍රමාණයකින් අඩුවෙයි කියලා අපි අපේක්ෂා කරනවා. ඒත් සමග රජයේ බදු ආදායම ඉහළ නංවා ගැනීමට රජයට විකල්පයන් යෝජනා කරන්න වෙනවා. ඒ එක විකල්පයක් හැටියට සියයට පහක තිබුණු රඳවා ගැනීමේ බද්ද සියයට දහය දක්වා වැඩි කරන්න රජය යෝජනා කරලා තියෙනවා. ඊට අමතරව අපනයන බදු යම් ආකාරයකට සංශෝධනය කිරීම ඇතුළු තවත් සංශෝධන කිහිපයක් මේ තුළ අන්තර්ගත වෙලා තියෙනවා.”