මාලබේ පොලිස් ස්ථානයේ රථ වාහන අංශයේ ස්ථානාධිපතිවරයාට පහරදී ගිනි අවියක් පෙන්වා මරණීය තර්ජනය කර පළාගොස් සැඟව සිටි පොලිස් සැරයන්වරයාව රක්ෂිත බන්ධනාගාර ගත කර තිබේ.
ඔහු පසුගිය 19 වනදා නීතිඥවරයකු මාර්ගයෙන් කඩුවෙල මහේස්ත්‍රාත් අධිකරණයට ඉදිරිපත් විය.
එසේ එළඹෙන 28 වනදා තෙක් රක්ෂිත බන්ධනාගාර ගත කර ඇත්තේ කඩුවෙල පොලිස් ස්ථානයට අනුයුක්තව සේවයේ නිරත ඩබ්ලිව්. එම්. ආර්. බණ්ඩාර චන්ද්‍රසේකර නමැති සැරයන්වරකි.
රාජකාරිමය ගැටලුවක් මත ඔහු හා රථ වාහන අංශයේ ස්ථානාධිපතිවරයා බහින්බස්වීමක් ඇතිවී ඇති අතර පසුව ඔහු ස්ථානාධිපතිවරයාට පහරදී සිය රාජකාරි ගිනි අවිය පෙන්වා තර්ජනය කර තිබූ බව වාර්තා විය.
එම සිද්ධිය පසුගිය 15 වනදා සිදුවූ අතර පසුව ඔහු ප්‍රදේශයෙන් පළාගොස් තිබුණි.