ජූලි මස පළමුවැනිදා සිට ක්‍රියාත්මක කිරීමට යෝජනා වී ඇති සමාජ ආරක්ෂණ බද්දෙන් අත්‍යවශ්‍ය ආහාර ද්‍රව්‍ය නිදහස් කරන ලෙස අත්‍යවශ්‍ය ආහාර ද්‍රව්‍ය තොග වෙළෙඳුන්ගේ සංගමය අගමැති රනිල් වික්‍රමසිංහගෙන් ඉල්ලා ඇත. අගමැතිවරයා වෙත ඊයේ (27) දින ලිපියක් යොමු කරන එම සංගමය ප්‍රකාශ කරන්නේ ඉතා කුඩාම ව්‍යාපාර වෙළෙඳසල්ද මෙම බදු ක්‍රමයට යටත්වන බවයි.
යෝජනා වී ඇති බදු අනුපාත අනුව භාණ්ඩ ආනයනයේදී මුළු වටිනාකමෙන් 2.5% ක්ද, නිෂ්පාදනයේ දී මුළු වටිනාකමෙන් 85% න් 2.5% ක්ද, තොග වෙළෙඳාමේදී මුළු වටිනාකමෙන් 50% න් 2.5% ක්ද, සිල්ලර වෙළෙඳාමේදී මුළු වටිනාකමෙන් 25% න් 2.5% ක්ද අය කරන බව සංගමය ප්‍රකාශ කරයි.
මෙම බදු අය කිරීම මත අත්‍යවශ්‍ය ආහාර ද්‍රව්‍යවල මිල තවත් ඉහළ අගයක් ගන්නා අතර පරිප්පු කිලෝග්‍රෑමයක් සඳහා රුපියල් 22.50 බදු මුදලක්ද, සීනි කිලෝග්‍රෑමයක් සඳහා රුපියල් 11.50 ක බදු මුදලක්ද, වියළි මිරිස් සඳහා රුපියල් 77.50 ක බදු මුදලක්ද අය වන බව සංගමය පෙන්වා දී තිබේ.