හෙට ඡන්දයක් පැවැත්වූවොත් රජය ඉන් පරාජයට පත්වන බව කෘෂිකර්ම රාජ්‍ය අමාත්‍ය ශෂීන්ද්‍ර රාජපක්ෂ මහතා පැවසීය.
රසායනික පොහොර වෙනුවට කාබනික පොහොර භාවිතා කිරීමට ජනාධිපති ගෝඨාභය රාජපක්ෂ මහතා ගත් තීරණය ‘මිනිසුන් වස විෂ කාලා මිනිස්සු මැරුනත් කමක් නෑ මගේ ඡන්දය මම දිනනවා’ කියන මතයේ සිට ගත් තීරණයක් නොවන බව ද රාජ්‍ය අමාත්‍යවරයා කීවේය.
එය මැතිවරණයකට ඉදිරිපත් වන කිසිම දේශපාලන නායකයෙක් නොගන්න ආකාරයේ තීන්දුවත් බව ද ශෂීන්ද්‍ර රාජපක්ෂ මහතා කීවේය.
රාජ්‍ය අමාත්‍යවරයා මේ බව පැවසුවේ බදුල්ල දිස්ත්‍රික්කයේ වී වගාව සඳහා ලබාදෙන පළමු කාබනික පොහොර තොගය නිකුත් කිරීමේ උත්සවයේ ප්‍රධාන ආරාධිතයා ලෙස එක්වෙමිනි. කුඹුරු හෙක්ටයාර 2000 ක් සඳහා මෙහිදී කාබනික පොහොර ලබාදීම සිදුකෙරිණි.
මෙවැනි තීරණයක් ගැනීමට හැකි නායකයන් අඩු බව ද රාජ්‍ය අමාත්‍යවරයා පැවසීය. එහෙත් හදවතින් නිවැරදි කාර්යයක් කරන්නේ නම් මොනතරම් අවලාද ආවත් අනිවාර්යයෙන්ම එම ගමන යන බව ශෂීන්ද්‍ර රාජපක්ෂ මහතා ප්‍රකාශ කළේය.