මත්ද්‍රව්‍ය ජාවාරම්කරුවෙකු සහ සංවිධානාත්මක අපරාධ කල්ලි සාමාජිකයෙකු වන මිරිස්සේ අමිල ප්‍රසංග හෙට්ටිහේවා හෙවත් සන්ෂයින් සුද්දාට වෙඩි තබා ඝාතනය කිරීම සඳහා ඝාතකයින් පැමිණි බව කියන වෑන් රථයේ හිමිකරු අත්අඩංගුවට ගෙන තිබේ.
පොලීසිය පැවසුවේ, මාතර දිසා අපරාධ විමර්ශන ඒකකය විසින් අත්අඩංගුවට ගෙන සැකකරුව කොටවිල පොලීසියට භාරදී ඇති බවය.
මෙසේ අත්අඩංගුවට ගෙන ඇත්තේ, වැල්ලම්පිටිය සේදවත්ත පදිංචි 33 හැවිරිදි පුද්ගලයෙකි.
කොටවිල පොලිස් වසමේ වරකපිටියේදි ඉකුත් 03 වැනිදා මෝටර් රථයෙන් ගමන් කරමින් සිටි සන්ෂයින් සුද්දාට මෝටර් රථය තුළදීම වෙඩි තබා ඝාතනය කර තිබුණි.
එහිදී වෙඩික්කරුවන් පැමිණි බවට CCTV දර්ශන මගින් හඳුනා ගත් වෑන් රථය පසුදින බණ්ඩත්තර වේල්ල අසළ දමාගොස් තිබියදී තිහගොඩ පොලිස් නිලධාරින් විසින් සොයාගනු ලැබිණි.
සිද්ධිය සම්බන්ධයෙන් කොටවිල පොලීසිය වැඩිදුර පරීක්ෂණ ආරම්භ කර තිබේ.