කොලොම්බියා ජනාධිපති අයිවන් ඩියුක් මාකේස් ගමන් ගත් හෙලිකොප්ටර් යානයට වෙනිසියුලානු දේශසීමාව ආසන්නයේදී වෙඩි ප්‍රහාරයක් එල්ල වී තිබේ.
කොලොම්බියා ජනාධිපතිවරයාට අමතරව ආරක්ෂක අමාත්‍යවරයා, අභ්‍යන්තර කටයුතු අමාත්‍යවරයා සහ එරට ඉහළ පෙළේ ප්‍රධානීන් කිහිපදෙනෙකු ද එම හෙලිකොප්ටර් යානයේ ගමන් කර ඇති බව විදෙස් මාධ්‍ය වාර්තා කරයි.
කෙසේවෙතත් එල්ල වූ වෙඩි ප්‍රහාරයෙන් කිසිවෙකුටත් තුවාල සිදුව නොමැති අතර හෙලිකොප්ටර් යානයට හානි සිදුව ඇති බව සඳහන්ය.
මෙම සිදුවීම පිළිබඳ අදහස් දක්වමින් කොලොම්බියා ජනාධිපති අයිවන් ඩියුක් මාකේස් පවසන්නේ අදාළ ප්‍රහාරය හෙළාදකින අතර ත්‍රස්තවාදී හෝ ප්‍රචණ්ඩකාරී ක්‍රියාවලීන් සම්බන්ධයෙන් තමන් කිසිවිටෙකත් බියට පත් නොවන බවය.
මෙම ප්‍රහාරය එල්ල කළ පාර්ශ්වය සම්බන්ධයෙන් මෙතෙක් තොරතුරු අනාවරණය වී නොමැත.
එමෙන්ම වෙනිසියුලාව විසින් ද කොලොම්බියානු ජනාධිපතිවරයාට එල්ල වූ ප්‍රහාරය සම්බන්ධයෙන් මෙතෙක් කිසිදු ප්‍රකාශයක් නිකුත් කර නොමැති බව විදෙස් මාධ්‍ය වාර්තා කර ඇත.