2008 – 2015 කාලසීමාවේදී සිදු වූ භාණ්ඩාගාර බැඳුම්කර ගනුදෙනු සම්බන්ධයෙන් වහාම පරීක්ෂණයක් පැවැත්විය යුතු බව ජනතා විමුක්ති පෙරමුණ පවසයි. ඒ සම්බන්ධයෙන් පරීක්ෂණ සිදු නොකරන්නේ නම් එය ජනාධිපතිවරයා විසින් සිය වගකීම් නොසලකා හැරීමක් ලෙස සැලකිය හැකි බවයි ජවිපෙ පවසන්නේ.
පාර්ලිමේන්තුවේ පොදු ව්‍යාපාර කාරක සභාව මෙන්ම විගණකාධිපතිවරයා ද පැවති රජය සමයේ සිදු වූ බැඳුම්කර ගනුදෙනු සම්බන්ධයෙන් විමර්ශන සිදු කළයුතු බවට නිර්දේශ කර තිබිණි.
2015 වසරේ සිදු වූ බැඳුම්කර වංචාව පිළිබඳ විමර්ශනය කිරීම සඳහා පත්කළ ජනාධිපති කොමිසමේ වාර්තාවෙන් ද පැවති රජය සමයේ සිදු වූ බැඳුම්කර ගනුදෙනු සම්බන්ධයෙන් විශේෂ විමර්ශනයක් සිදු කළයුතු බව නිර්දේශ කර තිබිණි.