ක්‍රිකට් ආයතනය පසුගිය දා කෝප් කමිටුවට කැඳවූ අවස්ථාවේදී එම කමිටුවේ සභාපති පාර්ලිමේන්තු මන්ත්‍රී මහාචාර්ය රංජිත් බණ්ඩාර මහතාගේ පුත් කනිෂ්ක බණ්ඩාර අදාළ රැස්වීමට පැමිණීම සම්බන්ධයෙන් පරීක්ෂණයක් සිදුකරන බව කථානායක මහින්ද යාපා අබේවර්ධන මහතා පවසයි.
ඒ සම්බන්ධයෙන් විපක්ෂ නායක සජිත් ප්‍රේමදාස මහතා අද (16)දින පාර්ලිමේන්තුවේදී විමසීමක් කළේය.
එහිදී අදහස් දක්වමින් ඔහු කියා සිටියේ විපක්ෂ නායකවරයා ලෙස තමන්ට කෝප් කමිටුවට සහභාගී වීමට නොහැකි බවත් කෝප් කමිටුවේ සභාපතිවරයාගේ පුත්‍රයා ඊට සහභාගී වූයේ කෙසේ ද යන්න පැහැදිලි කළ යුතු බවයි.
ඒ හේතුවෙන් ඔහුගේ කෝප් කමිටු සභාපතිත්වය අත්හිටුවා අදාළ සිද්ධිය සම්බන්ධයෙන් පරීක්ෂණයක් කරන ලෙස ඔහු ඉල්ලීමක් කළේය.