වෙළෙඳපොළේ නාඩු හාල් හිඟයක් මතුවී ඇත්තේ මහා පරිමාණ මෝල්හිමියන් කිහිප දෙනකුගේ ක්‍රියාකලාපයන් නිසා යැයි ගොවිජන එකමුතුවේ සභාපති අනුරාධ තෙන්නකෝන් මහතා පවසයි.
පාලන මිල ඉවත් කළොත් නාඩු සහල් වැඩි මිලට වෙළෙඳපොළට නිකුත්වනු ඇතැයි ද හෙතෙම විශ්වාසය පළ කළේය.
පසුගිය යල හා මහ දෙකන්නයේ නාඩු වී වගා කිරීම සියයට 70කට එහා තිබූ බවත් එම වී තොග මහ මෝල්හිමියන් රුපියල් 80-90ත් අතර මිලකට ගොවීන්ගෙන් ලබාගෙන ගබඩා කරගෙන සිටින බවත් ඔහු කීය.
තමා දන්නා වී මෝල්හිමියකු සතුව වී මෙට්‍රික් ටොන් ලක්‍ෂ 18ක් පවතින බවට තොරතුරු ලැබී තිබෙන බවද සහල් පාලන මිල ඉවත් වුවහොත් නාඩු සහල් වැඩි මිලට වෙළෙඳපොළට නිකුත් වනු ඇති බවද ඔහු කීය.
සෑම රජයක් පත්වූ විටම මහ වී මෝල්හිමියන් මෙවැනි හිඟයන් ඇතිකර පාලන මිල ඉවත් කර ගැනීමට කටයුතු කරන බවත් ඒ අයුරින්ම වර්තමාන රජය මගින් ද සහල් මිල පාලනය ඉවත් කර ගැනීමට ඔවුන් උත්සාහ දරන බවත් තෙන්නකෝන් මහතා පැවසීය.