විදුලියෙන් ධාවනය වන මෝටර් රථ සඳහා අය කරන බදු මුදල 5% සිට 50% දක්වා වැඩි කිරීමට අය – වැයෙන් ඉදිරිපත් කළ යෝජනාව යළි පෙර පරිදි 5% සීමාව දක්වා අඩුකිරීමට ජනාධිපති මෛත්‍රිපාල සිරිසේන මහතා තීරණය කර ඇත. ජනාධිපති මෛත්‍රිපාල සිරිසේන මහතා එම තීරණය ගෙන තිබෙන්නේ ඊයේ (23දා) පැවැති කැබිනට් මණ්ඩල රැස්වීමේදීය. මේ කැබිනට් රැස්වීමට මුදල් අමාත්‍ය රවි කරුණානායක මහතා සහභාගි නොවී සිටීමද අමාත්‍යවරුන්ගේ සුවිශේෂ අවධානයට ලක්ව තිබේ.
මේ පිළිබඳ යෝජනාව කැබිනට් මණ්ඩලයට ඉදිරිපත් වූ පසු මලික් සමරවික්‍රම, සාගල රත්නායක වැනි එක්සත් ජාතික පක්ෂයේ ප්‍රබල අමාත්‍යවරුන් රැසක්ම අදහස් ඉදිරිපත් කරමින් පවසා ඇත්තේ විදුලියෙන් ධාවනය වන මෝටර් සඳහා එවන් බදු මුදලක් පැනවීම අසාධාරණ මෙන්ම ප්‍රායෝගික නොවන බවය.
ජනාධිපති මෛත්‍රිපාල සිරිසේන මහතා එහිදී විශේෂයෙන්ම ප්‍රකාශ කර ඇත්තේ තමා පරිසර අමාත්‍යවරයා වශයෙන් කටයුතු කළද මේ තීරණය පිළිබඳව තමාද දැනුවත් වී නොසිටි බවත් පරිසර ආරක්ෂණය පිළිබඳ මුළු ලෝකයේම දැඩි සාකච්ඡාවකට ලක්ව ඇති සහ ඒ වෙනුවෙන් ප්‍රායෝගික ක්‍රියාමාර්ග ගන්නා අවස්ථාවකදී විදුලියෙන් ධාවනය වන මෝටර් රථවලට මෙලෙස බදු වැඩි කිරීම ප්‍රායෝගික නොවන කටයුත්තක් බවය.
මව්බිම