කැබිනට් සංශෝධනය ලබන සදුදා (22දා) සිදු වන බවත් ඒ සම්බන්ධයෙන් අමාත්‍යවරුන්ට දැනුම්දී ඇති බවත් වාර්තාවේ.
මේ සම්බන්ධයෙන් බුද්ධශාසන හා අධිකරණ කටයුතු අමාත්‍ය විජේදාස රාජපක්ෂ මහතාගෙන් කළ විමසීමකදී ඒ මහතා අදාළ කරුණ තහවුරු කර සිටියේය.
විදෙස්ගතව සිටින ඇමතිවරුන්ටද වහාම පැමිණෙන්නැයි දැනුම්දී ඇති බවද වාර්තාවේ.
මේ වන විට විදෙස්ගතව සිටින දයාසිරි ජයසේකර හා රාජිත සේනාරත්න යන ඇමතිවරුන්ටද මෙම පණිවිඩ ලැබී ඇති බව ආරංචි මාර්ගවලින් වාර්තා වේ.
එළඹෙන සදුදා දිනයේ පූර්ණ කැබිනට් සංශෝධනයක් සිදුවන අතර ප්‍රභල ඇමතිවරුන් වන රවී කරුණානායක, අර්ජුන රණතුංග, මංගල සමරවීර, දුමින්ද දිසානායක, ගයන්ත කරුණාතිලක, චන්දිම වීරක්කොඩි, විජිත් විජයමුණි සොයිසා වැනි අයගේ අමාත්‍යධුර සංශෝධනය වන බව ඉතා විශ්වාසකටයුතු මාර්ගයකින් අප වෙත වාර්තා වී තිබේ.
මේ අතර එජාප පසුපෙළ මන්ත්‍රීවරුන් කිහිපදෙනෙකුට නියෝජ්‍ය ඇමතිකම් හිමිවන බවද වාර්තාවේ. නලීන් බණ්ඩාර, බුද්ධික පතිරණ, මුජිබර් රහුමාන් යන අයට නියෝජ්‍ය ඇමතිකම් හිමිවීමට ඉඩ ඇතැයි වාර්තාවේ.